Memleket basshysy Qasym-Jomart Toqaevtyń málimdemesinde kásipkerlik sektordy qoldaýǵa baǵyttalǵan birqatar mindetter belgilengen. Prezıdent salyqtyq jeńildikter, nesıeler boıynsha tólemderdi keıinge shegerý, tekserýlerge tyıym salý máselelelrimen qatar, sapaly jumyspen qamtý, agroónerkásiptik keshendi úzdiksiz qamtamasyz etý, shaǵyn jáne orta bıznesti nesıeleýdi arttyrý qajettiligin erekshe atap ótti. Bul týraly Aýyl sharýashylyǵy qarjylaı qoldaý qorynyń baspasóz qyzmeti habarlady.
Shaǵyn jáne orta bıznestiń ózekti máselelerin sheshý erekshe nazar aýdarýdy talap etedi. Mysaly, aýyldaǵy azamattardyń jeńildetilgen nesıe alatyn kezde kepildikke qoıatyn múlki jetpeı jatatyn jaǵdaılar kezdesedi. Onyń da sheshimi bar. Mysaly, Aýyl sharýashylyǵyn qarjylaı qoldaý qorynda «Eńbek» baǵdarlamasyna qatysýshylardy qoldaýǵa arnalǵan kepildeme berý quraly bar. Sony paıdalanýǵa bolady.
Qor 2019-jyldyń qyrkúıek aıynan beri aýyldardaǵy, shaǵyn qalalardaǵy óziniń jeke bıznesin ashqysy keletin nemese jumys istep turǵan bıznesin keńeıtkisi keletin kásipkerlerdiń nesıelerin kepildendirý jumysyn atqaryp keledi. Qor kásipkerler úshin «Eńbek» baǵdarlamasy boıynsha nesıe beretin mıkroqarjy uıymdary men nesıe seriktestikteri aldynda kepil bolady.
Naqty aıtqanda, osy nesıe seriktesterinen nemese mıkroqarjy uıymdarynan nesıe rásimdeıtin azamattardyń nesıesi kepildendiriledi. Mysaly, kásibin jańa bastaǵandardyń alatyn nesıeniń 85%-ne deıin, jumys istep turǵan bıznesti keńeıtýge alǵan nesıeniń 50%-ne deıin kepildendiredi. Al, kóp balaly otbasylar men az qamtylǵan otbasylar alatyn nesıeniń 95 %-ne deıin kepildeme beriledi. Bul shaǵyn qalalar men shalǵaı aýyldardaǵy azamattar úshin úlken kómek.
Máselen, Almaty oblysyndaǵy Jambyl aýdanynyń turǵyny Demeý Kúlbalaev memleket tarapynan kórsetilip otyrǵan osy baǵdarlamanyń kómegine júgingen bolatyn.
2019 jyldyń sońynda «Isker» baǵdarlamasy boıynsha 6 mln teńge nesıe rásimdeýi úshin Demeý Qazıhanulyna 4 mln 785 myń teńge mólsherinde kepildeme qajet boldy. «Aýyl sharýashylyǵyn qarjylaı qoldaý qory» AQ jobany zerdelep, 4 785 myń teńgeniń kepildemesin berdi. Osylaısha, 6 mln teńge nesıege qol jetkizgen kásipker 208 bas qoı men mal azyǵyn satyp aldy. Aldaǵy ýaqytta Demeý Qazıhanuly mal basyn kóbeıtip, sharýashylyǵyn keńeıte túsýdi josparlap otyr.
Jalpy, «Eńbek» baǵdarlamasy aıasynda úsh jylda 3 mlrd 675 mln teńgeniń kepildemesi berildi. Osynyń nátıjesinde 1 112 kásipker jeńildetilgen nesıege qol jetkizip, kásipterin odan ári damytýda. Osy baǵdarlamanyń aıasynda nesıeni kepildendirý jumystary jalǵasady. Tolyǵyraq aqparat alý úshin oblys ortalyqtaryndaǵy, Nur-Sultan, Almaty jáne Shymkent qalalaryndaǵy Qordyń fılıalyna habarlasýǵa bolady.