Italııanyń áıgili fýtbolshysy Chıro Ferrara Neapolde ótken aýksıonda dańqy jer jarǵan Dıego Maradonanyń fýtbolkasyn 55 myń eýroǵa satyp, sol qarajatty tutastaı koronavırýske qarsy kúreske jumsady.
Argentınanyń ulttyq quramasy men Italııanyń A serııasynda óner kórsetetin «Napolıdiń» sapynda talaı bıik belesterdi baǵyndyryp, álemdik fýtbol tarıhynda esimi Pelemen qatar atalatyn Maradona osyndaı qaıyrymdylyq jasaǵan óziniń burynǵy komandalyq áriptesine zor rızashylyǵyn bildirdi. Dál osy fýtbolkany týra 33 jyl buryn Dıego Italııa men Argentına quramalary arasyndaǵy kezdesýden keıin Chıroǵa syıǵa tartqan edi.
53 jastaǵy Chıro Ferrara da kezinde myqty fýtbolshy. Neapolda týyp-ósken ol jergilikti «Napolı» men Týrınniń «Iýventýsty» sapynda oınady. 1987-2000 jyldar aralyǵynda Italııa ulttyq quramasynyń namysyn qorǵady. Amplýasy – qorǵaýshy. 1990 jyly álem chempıonatynyń qola júldegeri, 1988 jáne 2000 jyldary Eýropa birinshiliginiń kúmis jáne qola júldegeri atandy.