Qyzylorda qalasynda mektep oqýshylary oblystyq ishki ister departamenti ıývenaldy polısııa bólimshesiniń uıymdastyrýymen ZK-169/1 ýaqytsha ustaý abaqtysyna ekskýrsııada bolyp qaıtty. Bul týraly oblystyq ishki ister departamentiniń baspasóz qyzmeti habarlady.
«Bul sharany uıymdastyrýdaǵy negizgi maqsat, jastar men jasóspirimderdiń arasyndaǵy quqyq buzýshylyqtardyń aldyn alý bolyp tabylady» deıdi ıývenaldy polısııa bólimshesiniń bastyǵy Manarbek Esjanov. Onyń aıtýynsha, osyndaı profılaktıkalyq is-sharalardyń nátıjesinde aǵymdaǵy jyly kámelettik jasqa tolmaǵandar arasyndaǵy qylmystar birshama azaıǵan. Búgingi ótkizilip sharada balalar qylmyskerler ustalatyn abaqtyny kórgende qylmys jasaýdyń jat qylyq ekenin uǵynatyn bolady, deıdi mamandar.
«Naqty málimetterge súıener bolsaq, 2013 jyldyń 8 aıynda kámeletke tolmaǵandarmen jasalǵan qylmystar -2,9 paıyzǵa (102-den 99-ǵa) azaıǵan. Qylmysqa qatysqan kámelettik jasqa tolmaǵandardyń arasynda oqýshylar sany -48,6 paıyzǵa (107-den 55-ke) tómendedi», - delingen habarlamada.
Esepti merzimde ishki ister organdaryna quqyq buzǵan 2601 jasóspirim jetkizilip, olardyń 191-i qańǵybastyqpen aınalysqany úshin kámeletke tolmaǵandardy beıimdeý ortalyǵyna jatqyzylsa, 29-y alkogol ishimdigin iship, qoǵamdyq oryndarda júrgeni úshin ustaldy. Oblys kóleminde kámeletke tolmaǵandarmen jasalatyn quqyq buzýshylyqtyń aldyn alýda múddeli organdarmen birlese otyryp «Jasóspirim», «Túngi qaladaǵy balalar», «Jazǵy demalys» atty jedel-profılaktıkalyq is-sharalar ótkizildi.
Is-sharalar barysynda prokýratýra, bilim, balalardyń quqyǵyn qorǵaý basqarmalarmen jáne Nur Otan jastar qanaty ókilderimen birlesip, oıyn-saýyq oryndarynda jáne magazınderge reıdter uıymdastyryldy.
Nátıjesinde kámeletke tolmaǵandardyń túngi ýaqytta oıyn-saýyq mekemelerinde bolýyna jol bergen 34 kásipkerge kámelettik jasqa tolmaǵandarǵa temeki satqan 32 satýshyǵa, alkogol ónimderin satqan 33 satýshyǵa ákimshilik sharalar kórildi.
Qazirgi tańda oblys kóleminde ishki ister organdarynda 347 kámeletke tolmaǵan, 301 qolaısyz otbasy esepte turady. Olardy únemi turǵylyqty meken-jaılarynan tekserilip, profılaktıkalyq áńgimeler júrgizilýde.
Qurysh Nurymbet.