Álemdi álekke salǵan indetke baılanysty Qazaqstan aýmaǵynda karantın rejiminiń jarııalanǵanyna da bir jarym aı ýaqyt bolypty. Osy merzim elimiz úshin asa bir jaýapty ári synaq kezeńi bolǵany aqıqat. Karantın rejiminde otyrý el-jurtqa ońaı tımedi, al onyń basqa da qosymsha zardaptary ushan-teńiz bolǵany anyq.
Osyǵan oraı Memleket basshysy Qasym-Jomart Toqaev Qazaqstan halqyna arnaǵan Úndeýinde eldiń basyna túsken aýyrtpalyqqa nazar aýdara otyryp, «...qazirgideı kúrdeli kezde árbir azamat bizdiń nazarymyzda bolady. Memleket eshkimdi qıyndyqta qaldyrmaıdy» dep aıtty. Osy tilsiz jaýmen arpalysyp júrgen dárigerler qaýymynyń ólsheýsiz eńbegin ataı otyryp, olarǵa Úkimet tarapynan berilip jatqan erekshe qoldaý, eldegi koronavırýs jaǵdaıynda qozǵalǵan máseleler men ony sheshý joldary tilge tıek etildi.
Ár nárseniń bir qaıyry bolady, osy izgi habardan keıin el arqasy bir keńip qalǵandaı áser qaldyrdy. «Jumyla kótergen júk jeńil» demekshi, halyq bolyp osy málimdemedegi Prezıdent aıtqan talaptar men qarapaıym erejelerdi buljytpaı oryndap, qaterden aman shyǵý barsha azamattyń óz qolynda. Sol sebepti, bir jaǵadan bas, bir jeńnen qol shyǵara otyra, Prezıdent Úndeýin shamshyraq qylyp ustap, qıyndyqty birlese jeńip shyǵatynymyzǵa senimimiz mol.
Baýyrjan YDYRYSOV,
Memleket tarıhy ınstıtýtynyń ǵylymı qyzmetkeri, tarıh magıstri