2020 jylǵy 29 sáýirde ótken «QazMunaıGaz» UK AQ Dırektorlar keńesiniń otyrysynda jańa uıymdyq qurylymdy bekitý týraly sheshim qabyldandy. Sheshim kompanııanyń qarjy jaǵdaıyn turaqtandyrý jáne naryqtyq faktorlardyń jaǵymsyz yqpalyn azaıtýǵa baǵyttalǵan is-sharalardyń aıasynda qabyldandy. Bul týraly atalǵan kompanııanyń jurtshylyqpen baılanys departamenti habarlady.
QMG ortalyq apparaty uıymdyq qurylymynyń jańa jobasy tómendegilerdi qamtıdy:
-geologııa, barlaý jáne óndiris bólikterin biriktirý. Sáıkesinshe, Basqarma tóraǵasynyń geologııa jáne barlaý jónindegi orynbasarynyń qyzmeti qysqartyldy;
-basqarý deńgeılerin azaıtý. Nátıjesinde 22 basqarýshy dırektordyń laýazymdary joıylady;
-departamentterdiń sanyn úsh ese azaıtý.
-Korporatıvtik ortalyqtyń qurylymy shaǵyn ári jedel qımyldaýǵa jáne bıznes úshin daǵdarys saldaryn az shyǵynmen eńserý úshin tıimdi sheshimder qabyldaı alatyndaı bolýy tıis. Daǵdarysqa qarsy strategııany júzege asyrýǵa basa nazar aýdarý maqsatymen kóptegen qyzmet túrlerinen bas tartamyz jáne enshiles kompanııalarmen yqpaldastyqtyń tetikterin qaıta qarastyratyn bolamyz, dedi QMG Basqarma tóraǵasy Alık Aıdarbaev.
QMG-da bıznes-prosester ońtaılandyrylyp, daǵdarysqa baılanysty ózektiligin joǵaltqan kóptegen jobalar men is-sharalardy júzege asyrý boıynsha josparlar qaıta qarastyrylýda. Nátıjesinde ortalyq apparattaǵy qyzmetkerlerdiń shtattyq sanyn 34%-ǵa – 729-dan 480 adamǵa deıin azaıtý týraly sheshim qabyldandy.
QMG basshylyǵy jumysshylar men olardyń otbasy músheleriniń aldyndaǵy áleýmettik jaýapkershiligin tereń uǵyna otyryp, bosatylǵan qyzmetkerlerge barynsha qoldaý kórsetýge nıetti. Bosatylǵan qyzmetkerlerdiń tańdaýy boıynsha qoldaýdyń birneshe túri kórsetilmek. Atap aıtqanda, birjolǵy járdemaqy tóleý nemese basqa jumysqa turý úshin rekrýtıngtik uıymdardyń qyzmetin usyný ne QMG esebinen qaıta oqytýdan ótý. Áleýmettik jaýapkershilikke negizdelgen bosatý sharalary «Samuryq-Qazyna» Qorynyń tapsyrmasyn oryndaý aıasynda daıyndalady.