Pavlodarda bir top qyz kámelettik jasqa tolmaǵan tanysyn uryp ketken. Búgin Pavlodar qalasynyń mamandandyrylǵan ákimshilik sotynda tóbeleske qatysy bar 7 boıjetkenge qatysty úkim shyqty. Bul týraly oblystyq Polısııa departamentiniń baspasóz qyzmeti habarlady.
«28 sáýir kúni buryn tanys bolǵan qyzdar arasynda kelispeýshilik bolǵan. Tóbelestiń sebebi – zardap shekken qyz tanys qyzǵa sporttyq kıimin qaıtarmaı qoıǵan. Sondaı-aq, tirek pýnktinde alkogoldi ishimdik ishkeni úshin bes qyzǵa qatysty ákimshilik jaza qoldanylady. Olardyń bári 5 aılyq eseptik kórsetkish kóleminde aıyppul tóleıdi», - delingen habarlamada.
Sondaı-aq, 3 mamyr kúni Pavlodar qalasyndaǵy mamandandyrylǵan ákimshilik sotta tóbeleske qatysqan 7 qyzǵa qatysty QR Ákimshilik quqyq buzýshylyq kodeksiniń 434 (usaq buzaqylyq) jáne 476-baptary (tótenshe jaǵdaı rejımin buzý) boıynsha sot boldy. Sonymen qatar, tóbeleske qatysqan bir qyz osy eki baptan bólek QR Ákimshilik quqyq buzýshylyq kodeksiniń 478-baby (tótenshe jaǵdaı rejımi tártibin buzýǵa ıtermeleý áreketi) boıynsha is qozǵaldy.
Pavlodar oblystyq Polısııa departamentiniń málimetine sáıkes, tóbeleske qatysqandardyń bári 5, 10, 15 táýlikke qamaýǵa alynǵan. «Tóbeleske qatysqandardyń ekeýinde kámelettik jasqa tolmaǵan balalary bar, sol sebepti olardyń jazasy jeńildetilip, birine 15 AEK, ekinshisine 10 AEK kóleminde aıyppul jazyldy. Olar ákimshilik jazadan bólek, ishki ister organdaryna «buzaqy tóbeleskish» retinde esepke alyndy», - delingen habarlamada.
Sondaı-aq tóbeleske qatysýshylardyń bárine qatysty QR QK-niń 389-baby, 3-bólimi (ozbyrlyq) boıynsha sotqa deıingi tergeý isi bastaldy.
«Barlyq qyz laıyqty jazasyn alady. Tergeýshiler qajetti tergeý amaldaryn júrgizip jatyr. Qajetti materıaldar jınaldy. Olardyń qanshalyqty deńgeıde kináli ekenderin sot sheshedi», - delingen baspasóz qyzmetiniń habarlamasynda.