Aýyl sharýashylyǵy mınıstrligi kepilzattyq saıasatty qaıta qarady: endi fermerlerdi nesıeleý boıynsha kepildikter joǵary deńgeıde baǵalanady. Bul týraly Aýyl sharýashylyǵynyń birinshi vıse-mınıstri Aıdarbek Saparov aýylsharýashylyq bıznesti qarjylandyrýǵa arnalǵan beınekonferensııa barysynda aıtty.
Aýyl sharýashylyǵy mınıstrliginde kóktemgi dala jumystaryn qarjylandyrý, aýylsharýashylyq ónimderin forvardty satyp alýdy engizý, aýyl kásipkerligine mıkrokredıt berý jáne aýylsharýashylyq tehnıkalary men jabdyqtaryn lızıngke berý týraly beınekonferensııa ótti. Is-sharaǵa Aýyl sharýashylyǵy mınıstrliginiń qyzmetkerleri, fermerlik sharýashylyq basshylary, oblys ákimdikteri, «Atameken» UKP, «QazAgro» UBH, Azyq-túlik korporasııasy, Agrarlyq nesıe korporasııasy (ANK), «Qazagrofınans», Aýyl sharýashylyǵyn qarjylaı qoldaý qory jáne Qazaqstan Fermerler odaǵy qatysty.
«QazAgro» qarjy ınstıtýttarynyń basshylary fermerlerdi qarjylandyrýdyń bıylǵy baǵdarlamalarynyń oryndalýy týraly baıandady. Sondaı-aq «Agrokredıt» korporasııasynyń ókili «Keń Dala» baǵdarlamasy boıynsha nesıelendirý nátıjeleri týraly aıtty, baǵdarlama aıasynda shaǵyn jáne orta fermerlerge jyldyq 5% -ben 70 mlrd teńge berildi. Al «Qarapaıym zattar ekonomıkasy» baǵdarlamasy boıynsha fermerlerdi qarjylandyrýǵa bólingen 100 mlrd-tyń 6,5-i ıgerildi. Nesıe berýdi tezdetý úshin barlyq jaǵdaı qarastyrylýda. ANK ótinimderdi qarastyrý men tıisti qujattardyń ýaqytyn qysqartady.
«Qazagrofınans» - ta jeńildetilgen júıemen qarjylandyrýǵa kiristi. Búgingi tańda kóktemgi dala jumystaryna arnalǵan tehnıkalarǵa 33,3 mlrd. teńgege ótinimder maquldandy. Sonymen qatar, KAF ókilderi fermerler arasynda lızıngke suranystyń óskenin atap ótti. Tótenshe jaǵdaı kezinde kompanııa fermerlerdi qoldaý boıynsha birqatar baǵdarlamalar engizdi. Atap aıtqanda, «Qazaqstanda jasalǵan» jeńildetilgen baǵdarlamasy iske qosyldy, ol fermerlerge avanstyq tólemdersiz, komıssııasyz jáne kepildik tólemsiz 6% -ben 10 jylǵa jáne 1 jylǵa deıingi tólemnen bosatý jeńildigimen beriledi.
Aýyl sharýashylyǵyn qarjylaı qoldaý qory «Eńbek» baǵdarlamasy boıynsha nesıelik ótinimderdi qaraý merzimin 11 kúnnen 4 kúnge deıin qysqartty. Bıyl aýyl bıznesi shamamen 42 mlrd teńgege qarjylandyrylady.
О́z kezeginde Azyq-túlik kelisim shart korporasııasy Ádilet mınıstrliginde 2020 jylǵa arnalǵan aýylsharýashylyq ónimderin forvardty satyp alý erejelerin tirkegenin habarlady.
Qarjy uıymdarynyń menedjerlerinen keıin, Qazaqstan fermeler odaǵynyń ókili sóz aldy. Qanat Súleımenov fermerlerdiń kepildigin tómen baǵalaýdyń qıyndyǵyn aıtty. Osyǵan baılanysty mınıstrdiń birinshi orynbasary Aıdarbek Saparov Aýyl sharýashylyǵy mınıstri Saparhan Omarovtyń tapsyrmasymen kepil zat saıasaty qaıta qaralǵanyn jetkizdi. Endi fermerlerdiń kepildigi maksımaldy deńgeıde baǵalanatyn bolady.
«Qazirgi tótenshe jaǵdaıda fermerler barlyq qajetti zattarmen qamtamasyz etilýi kerek, sondyqtan oblystardyń ákimdikteri men «QazAgro»UBH «Qarapaıym zattar ekonomıkasy» baǵdarlamasy boıynsha bólingen qarajatty eskere otyryp, kóktemgi dala jumystaryna ýaqtyly daıyndalý jáne sapaly bolý úshin barlyq sharalardy qabyldaýy qajet. Mıkrokredıt berý jáne nesıelerdi kepildendirýdiń jańa quralyn engizý máselelerin erekshe baqylaýǵa alyp, sonymen qatar aýylsharýashylyq ónimderin forvardty túrde satyp alýdy tıisti túrde júzege asyryp qamtamasyz etý kerek», - dep atap ótti A. Saparov.