2020 jylǵy 20 mamyrda Nıý-Iorktyń ońtústik okrýgi boıynsha AQSh okrýgktik soty Ilıas pen Vıktor Hrapýnovtarǵa qarsy sheshim shyǵardy. Bul týraly Ádilet mınıstrliginiń baspasóz qyzmeti habarlady.
«Múddesin Ádilet mnıstrligi bildiretin Almaty qalasynyń ákimdigi, jáne BTA Bank talapkerlerdiń talap-aryzdaryn rastaıtyn aqparatty jaýapkerlerdiń áshkereleýin talap etken edi. Taraptardyń ustanymdaryn zerdelep bolyp, sot Ilıas pen Vıktor Hrapýnovtardy sotpen «mysyq-tyshqan oıynyn» ádeıi uıymdastyrdy jáne olardyń bul is-áreketi jazalanýǵa tıis degen sheshimge keldi. Sot Ilıastyń joǵalǵan elektrondyq hattar týraly syltaýlaryn aqylǵa qonbaıdy dep tanydy.
Buǵan deıin, sot Muhtar Ablıazovtyń osyǵan uqsas is-áreketin jazalaǵan edi. Ol kezde Ablıazov dáleldemelerdi áshkereleý prosedýrasy barysynda qujattardy usyna almaǵan bolatyn.
Sot Almaty qalasynyń ákimdigi men BTA Banktiń talap-aryzdaryna tikeleı qatysy bar belgili aqparattyń Hrapýnovtardyń esterinde joq ekendigi týraly málimdemelerin jalǵan dep tanydy. Sot Ilıasty tıisti aıǵaqtardy joıǵan dep tujyrymdady.
Sýdıa Ilıas pen Vıktor Hrapýnovtarǵa Almaty qalasy ákimdigi men BTA Bank zańgerlerine ketken shyǵyndaryn tóleýdi buıyrdy.
Sonymen qatar sot Hrapýnovtardyń budan bylaı belgili dáleldemelerdi usyný quqyǵy bolmaıdy jáne alqa bılerge Ilıastyń dáleldemelerdi ádeıi joıǵandyǵy jáne joıylǵan dáleldemeler málimdelgen talap-aryzdardy qoldaıtyn edi degen nusqaý beriledi dep qaýly etti. Buǵan deıin, sot Muhtar Ablıazovqa da qatysty alqa bılerge dál osyndaı nusqaý beriletindigi týraly qaýly etken edi.
Odan bólek, Almaty qalasy ákimdigi men BTA Bankiniń Felıks Saterge qarsy qatar júrip jatqan sot prosesinde de sot talapkerlerdiń paıdasyna sheshim qabyldady. Jaýap alý barysynda Sater Hrapýnovtar men Ablıazovtyń Almaty qalasynda tyńshylary bar ekendigi jáne onyń qaýipsizdigine qaýip-qater tónýi múmkindigi týraly málimdedi. Sot óziniń sheshiminde Ablıazovtyń 2018 jyly Qazaqstanda BTA Banktiń buryńǵy basshysyn óltirgeni jáne kóptegen basqa da qylmystar úshin sottalǵandyǵyn eskere otyryp, Saterdiń qorqynyshy senýge turarlyq ekendigin atap ótti» delingen habarlamada.