Qazaly aýdanyndaǵy Ǵanı Muratbaev aýylyn gazdandyrý jumystary bastaldy. Osyǵan oraı eldi mekenge barǵan aýdan ákimi Murat Ergeshbaev aýyl turǵyndary jáne «Sapaq» óndiristik kooperatıviniń jumysshylarymen kezdesti.
Aýdan basshysy eldi mekenge kógildir otynnyń kelý turǵyndary úshin óte mańyzdy ekenin jetkizdi.
– Bul úlken mereke. О́ıtkeni, osy qýanyshty sátti talaı jyldar asyǵa kúttińizder. Mine, sol armandaryńyz oryndalyp otyr. Endi az ǵana ýaqyttan keıin qurylys jumystary aıaqtalyp, kógildir otyndy paıdalanatyn kún alys emes. Jobanyń júzege asýyna «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasynyń yqpaly zor. Aýyldaryńyzda atalǵan baǵdarlama arqyly taǵy da 7 kóshege asfalt tóselip, balabaqshaǵa jóndeý jumystary júrgiziledi. Sondaı-aq, aýyldy aıaq sýmen qamtamasyz etetin «Aqaryq» kanalynyń arnasy tazalanady, – dedi Murat Ergeshbaev.
Aýyldaǵy aýqymdy istiń bastalýyna uıytqy bolǵan jergilikti bılik ókilderine aýyldyq ardagerler keńesiniń tóraǵasy Býrabaı Rahmetov alǵys aıtyp, rızashylyq bildirdi.
Qazaly aýdanynda «Jumyspen qamtýdyń 2020-2021 jyldarǵa arnalǵan jol kartasy» memlekettik baǵdarlamasy aıasynda 3 mlrdtan astam qarjyǵa 42 joba júzege asýda. Onyń ishinde Ǵ.Muratbaev aýylyndaǵy 4 jobaǵa 500 mıllıonnan astam teńge bólingen.