Álemge tanymal BoxRec sport saıty kásipqoı boksta ár jyldary óner kórsetken eń myqty 10 sportshyny anyqtady, - dep jazady Egemen.kz.
Atalǵan saıttyń mejeleýine qaraǵanda jasy qyryqtyń qyrqasyna shyqqan amerıkandyq boksshy Floıd Meıveder teńdesi joq bylǵary qolǵap sheberi retinde tanylsa, kelesi oryndarǵa fılıppındik Mennı Pakıao, argentınalyq Karlos Monzon taban tiregen eken. Osylardyń árbirine toqtalar bolsaq:
Floıd MeıvederKásipqoı boks rınginde 21 jyl ter tógip, bir rette jeńilip kórmeı, 50 ret jekpe-jek ótkizgen. Nátıjesinde «Bir dáýirdiń uly boksshysy» degen ataqqa ıe boldy. Bul azamat 2012-2015 jyldary Forbes jýrnaly tiziminde eń baı sportshylardyń da kóshin bastady.
Mennı PakıaoBul boksshy jasy 40-tan assa da boks rıngisinen áli túspegen tarlan. Sporttyq jolynda ártúrli segiz dıvızıonnyń chempıony atanyp, belbeýine ıe bolǵan álemdigi jalǵyz adam. Biraq 2015 jyly uıymdastyrylǵan «Ǵasyr saıysynda» ataqty Floıd Meıvederen jeńilip qaldy.
Karlos MonzonArgentınalyq ańyz boksshy Karlos Monzon 1995 jyly dúnıeden ótkenge deıin orta salmaqta oǵan teń keler álemde adam bolmady. Chempıondyq belbeýdi 7 jyl boıy jan balasyna bermedi. Osy ataq úshin 59 dúrkin rıngke kóterilip bárinde jeńiske jetti.
Muhammed ÁlıBul sportshy tek boks áleminde ǵana emes, ózi ómir súrgen qoǵamǵa ózgeris ákelgen saıası qaıratker. 1967-1970 jyldary Vetnam soǵysyna barýdan bas tartqany úshin úlken sporttan úsh jyl shettetilgeni bar. Kásipqoı boksshy retinde 1975 jyly Jo Freızermen ótkizgen jekpe-jegi sport tarıhynda eń tańdaýly saıys retinde tarıhta qaldy.
Shýgar Reı RobınsonKásipqoı bokstyń jeńil, jartylaı jeńil, orta, jartylaı aýyr salmaqtarynda óner kórsetip, barlyǵy 174 dúrkin jekpe-jek ótkizip, onyń 19-ynda ǵana jeńilis tapqan tarıhtaǵy asa qajyrly bylǵary qolǵap sheberleriniń biri. Kásipqoı boks áleminde chempıondyq belbeýdi bes dúrkin jeńip alǵan jalǵyz boksshy.
Bernard HopkınsBúgingi tańda 55 jasqa tolǵan kásipqoı boksshy Bernard Hopkıns óz ómirinde 67 dúrkin jekpe-jek ótkizip, onyń 55-inde jeńiske jetip jartylaı aýyr salmaqta álem chempıony atanǵan azamat. Sonymen qatar 1988-2016 jyldar aralyǵynda úzdiksiz 28 jyl ter tógip, kásipqoı boksta uzaq jyl óner kórsetken erekshe sportshy.
Jo Lýıs1937-1949 jyldar aralyǵynda kásipqoı bokstyń asa aýyr salmaq dárejesi boıynsha 25 dúrkin saıys ótkizip, barlyǵynda jeńiske jetken ańyz tulǵa. Ol AQSh-ta ulttyq batyr deńgeıinde ulyqtalǵan alǵashqy qara násildi sportshy.
Archı MýrBul jigit asa aýyr salmaq boıynsha álem chempıony ataǵynan aıyrylmaı ony uzaq jyl ustaǵan erekshe talant. Iаǵnı, 1952 jyldyń jeltoqsan aıynan bastap, 1962 jyldyń mamyryna deıin chempıondyq ataǵyn 10 jyl boıy bylq etpeı qorǵaǵan myqty. Boksshy retinde saıys stıli qorǵaný arqyly shabýylǵa ótetin ereksheligimen tarıhqa tańbalandy. 1998 jyly dúnıeden ótti.
Oskar De La Hoıa2009 jyly sáýir aıynda sporttyq karerasyn aıaqtaǵan bul azamat oǵan deıin eshkimge des bermedi. Qazirgi tańda 47 jasqa tolǵan kásipqoı boksshy ártúrli 6 dıvızonda óner kórsetip, 10 dúrkin álem chempıony tıtýlyn ıelengen sanaýly talanttyń biri. Bes jasynan bastap bokspen shuǵyldanǵan sportshy qazirgi tańda tanymal bıznesmen.
Hýlıo Sezar ChavesBul sportshy meksıkalyq boksshylar soıynan oıyp oryn alǵan talant. 1980-2005 jyldary úsh dıvızonda óner kórsetip, barlyǵynyń chempıondyq ataǵyna ıe bolǵan. Qazir 57 jasqa tolyp otyrǵan boksshy óziniń chempıondyq tıtýlyn 27 dúrkin qorǵap rekord ornatqan jalǵyz adam. 1994 jyly Frenkı Randallmen kezdesip jeńilis tapqanǵa deıin 87 jekpe-jek ótkizip, barlyǵyn jeńispen aıaqtaǵan eken.