10-11 maýsym kúnderi Premer-Mınıstr Asqar Mamın Qazaqstannyń barlyq óńirlerindegi bıznes ókilderimen selektorlyq keńester ótkizdi, onda iskerlik belsendilikti qalpyna keltirý máseleleri qaraldy,- dep habarlady primeminister.kz.
Kásipkerler Úkimet basshysyna aýyl sharýashylyǵy, azyq-túlik ónerkásibi, týrızm, qoǵamdyq tamaqtaný, saýda, qurylys, bilim berý, óńdeý ónerkásibi salalaryndaǵy bıznestiń ózekti máseleleri týraly aıtyp berdi.
Bıznes-qaýymdastyqtyń sýbsıdııalar alý, jeńildikti nesıe berý jáne aǵymdaǵy qaryzdardy qaıta qurylymdaý, nesıeler boıynsha tólemderdi keıinge qaldyrý, aýyl sharýashylyǵy tehnıkasynyń lızıngi, tarıf belgileý, memlekettik jáne kvazımemlekettik sektorlardyń satyp alýlaryna otandyq taýar óndirýshilerdiń qatysýyn odan ári arttyrý, memlekettik satyp alý týraly sharttar boıynsha mindettemelerdi oryndaý merzimderin qaıta qaraý máselelerine qatysty usynystary qaraldy.
Keńesterdiń moderatory "Atameken" UKP boldy. Barlyq óńirlerden 229 bıznesmen qatysty, 40-tan astam adam baıandama jasady. Máselelerdi talqylaýǵa "Atameken" UKP tóralqa tóraǵasy T. Qulybaev, ortalyq memlekettik organdardyń basshylary, oblystardyń jáne respýblıkalyq mańyzy bar qalalardyń ákimderi, "Samuryq-Qazyna" UÁQ" AQ, "Báıterek" UBH" AQ jáne salalyq bıznes-qaýymdastyqtardyń ókilderi qatysty.
Úkimet basshysy beıindi mınıstrlikter men óńirlerdiń ákimdikterine bıznestiń ózekti máselelerin qaraýdy jáne olardy sheshý boıynsha sharalar qabyldaýdy, sondaı-aq kásipkerlikti damytýdyń júıeli máselelerin Ekonomıkalyq ósimdi qalpyna keltirý jónindegi memlekettik komıssııanyń qaraýyna shyǵarýdy tapsyrdy.
"Úkimettiń mindeti – iskerlik belsendilikti qalpyna keltirý úshin barlyq qajetti jaǵdaılardy jasaý. Biz bıznestiń daǵdarysqa deıingi deńgeıine tezirek qaıta kelýi úshin barlyq kúsh-jigerdi jumsaýymyz kerek", — dedi A. Mamın.