Kóptegen jankúıerler taǵytsyzdana kútken aralasy jekpe-jektiń has sheberleri – qazaqstandyq Artem Reznıkov pen reseılik Iýsýf Raısov arasyndaǵy báseke 5 qyrkúıekte ótetin boldy, - dep jazady Egemen.kz
Bul jaıynda bizge "Alash Praıd" klýbynyń prezıdenti Danııar Qasqaraýov habarlady. Onyń aıtýynsha, ázirge kópshilik kútken básekeniń qaı jerde jáne qandaı arenada ótetini anyqtalǵan joq. "Aldaǵy jekpe-jektiń mańyzy joǵary. Sebebi, qazirgi kezde Raısovtyń dańqy dúrkirep tur. Ol ASA promoýshenindegi eń úzdik sportshylardyń biri. Desek te bizdiń Artem da osal emes. Sońǵy kezderi Reznıkov tamasha óner kórsetip, qarsy kelgenderin qoǵadaı japyryp keledi. Mine, endi qos myqtynyń jolyǵatyn kúni jaqyndap keledi", deıdi D.Qasqaraýov.
Joǵaryda esimderi atalǵan jeńil salmaqtaǵy qos sportshyny jaqynyraq tanystyratyn bolsaq, Iýsýf Raısov 25 jasta. Cheshenstannyń Groznyı qalasynyń týmasy aralas jekpe-jekten 17 kezdesý ótkizip, tek bireýinde ǵana utyldy. 2016 jyldyń 18 jeltoqsanynda Sankt-Peterbýrgte Marat Balaevqa ese jibergen bolatyn. 2018 jyldyń 5 mamyrynda Máskeýde dál sol sańlaqqqa san soqtyrǵan Iýsýf jartylaı jeńil salmaqtyń chempıondyq belbeýin ıelendi. Qazirgi reıtıngte Raısov ekinshi orynda tur.
Artem Reznıkov 28 jasta. Qazaqstannyń týmasy 22 márte oktagonǵa shyǵyp, 16 ret jeńiske jetti. Sońǵy ret ol osydan úsh jyl buryn jeńilistiń kermek dámin tatqan bolatyn. Sodan beri qatarynan bes ret óz qarsylastaryn aıqyn basymdyqpen utty. ASA reıtınginde jerlesimiz altynshy oryndy enshileýde.