...Kúni keshe ǵana atalyp ótken Ekinshi dúnıejúzilik soǵystaǵy Jeńistiń 75 jyldyǵy aldynda, aýdandyq gazetke maqala jazý maqsatymen, qarasaılyq kózi tiri maıdangerlerdiń eń úlkeni, Qyrǵaýyldy aýylynda turatyn 99 jastaǵy Isa Kerimtaev qarııanyń úıine barǵanbyz.
1921 jyldyń 1 qańtarynda dúnıege kelgen soǵys ardageri atamyzdyń áserli áńgimesin tyńdadyq, aq batasyn aldyq, garmonmen tartqan áýenin tyńdadyq! Bir kezde kózimiz tórde ilýli turǵan ádemi sýretke tústi de:
– Ata, ana janyńyzda otyrǵan aq shashty ádemi ájemiz kim? – dep suradyq jýrnalıstik áýestikpen. Al maıdanger qart sál-pál oılanyp otyryp:
– Qudaǵı ǵoı, týǵan qudaǵıym Gúlnár Mirjaqypqyzy Dýlatova, – degeni. Eleń ete qaldyq. Sodan soń: – Marqumnyń peıishte nury shalqysyn, keremet adam edi ǵoı, shirkin! Qyzym Jannanyń súıikti enesi bolatyn, – dedi taǵy da.
Gúlnár ájemizdiń Alty alashtyń ardaǵy, ultymyzdyń uly tulǵasynyń biri Mirjaqyp Dýlatovtyń qyzy ekeni belgili. Biz ol kisiniń 2013 jyly 98 jasynda dúnıeden ótkenin, al ómirlik seriginiń qazaqtyń qabyrǵaly qalamgeriniń biri, kezinde «Qazaq ádebıeti» gazetiniń redaksııasyn basqarǵan, «Qazaq sovet ensıklopedııasy» bas redaktorynyń orynbasary qyzmetin atqarǵan, Moıynqum jerinde týǵan Áben Satybaldıev ekenin burynnan biletinbiz.
Isa atamyzdyń qyzy Janna Kerimtaeva belgili teatr jáne kıno aktrısasy, Qazaqstannyń eńbek sińirgen ártisi. Ol Gúlnár ájemiz ben Áben atamyzdyń balasy, belgili baspager Erlan Satybaldıevtiń zaıyby eken.
– Sonda bul sýret qashan, qaı jerde túsirilgen? – dep suradyq endi.
– Osydan on shaqty jyl buryn, sol kisilerdiń úıinde, – dedi sózge aralasqan qarııanyń úlken kelini Svetlana. – Bizdi apamyz jıi-jıi qonaqqa shaqyryp turatyn. Sondaı kezdiń birinde ǵoı.
... Ulaǵatty ustazdyq qyzmetin soǵysqa deıin de atqarǵan, onan keıin de úzbeı uzaq ýaqyt muǵalim, mektep dırektory bolǵan qazaqtyń qaharman jeńimpaz jaýyngeriniń biri Isa Tóleńgituly atamyz bizge aq tilegin aqtaryla aıtyp qala berdi...
Berikbaı QADYQOV,
jýrnalıst
Almaty oblysy,
Qarasaı aýdany