Tarazdyń birqatar nysandarynda sanıtarlyq talap oryndalmaı tur, - dep habarlaıdy Egemen.kz.
Elimizde karantın talaptary engizilgeli beri Taraz qalasynda da tıisti nysandar jumysyn toqtatqan bolatyn. Birinshi kezekte adamdardyń densaýlyǵy men qaýipsizdigi basty nazarǵa alynyp, kóptegen jerler qashyqtyqtan jumys isteýge tártibine kóshken. Keıinnen karantın talaptary tolyq alynbasa da, birshama jeńildetilip, tıisti nysandarǵa jumysyn qaıta bastaýǵa ruqsat berildi. Degenmen, búgingi tańda Taraz qalasy boıynsha jumysyn qaıta bastaǵan keıbir saýda oryndary men qoǵamdyq tamaqtaný nysandarynda sanıtarlyq talaptar tolyq saqtalmaı otyr. Búginde birine jan qaıǵy bolsa, birine mal qaıǵy bolyp tur. Biri qaýipti naýqasty juqtyryp, densaýlyǵymen álek bop júrse, endi biri tabys tabýdyń sońyna túsip, talaptardy saqtaýdy umyt qaldyrǵan.
Sanıtarlyq talaptardy meılinshe saqtaý kerektigin eskertip kelgen mamandar endi tıisti nysandarǵa aıyppul salýǵa kiristi. Karantın talaptaryna baılanysty kóne shaharda reıd jumystary júrgizilip, talapqa saı bolmaǵan birqatar nysandarǵa arnaıy hattamalar toltyryldy. Bul oraıda Taraz qalasy ákiminiń orynbasary Ashat Esenǵalıev jáne polısııa qyzmetkerleri men taýarlar men qyzmetterdiń sapasyn jáne qaýipsizdigin baqylaý basqarmasynyń mamandary qaladaǵy saýda oryndary men tamaqtaný núktelerin aralady. Nátıjesinde, kóptegen kemshilikter anyqtalǵan. Tipti shahar turǵyndarynyń ózi koronavırýs deıtin qaýipti indetke jaýapsyz qarap, Tarazda indettiń kóbeıýine jol ashyp otyr eken. Bir keshte ǵana júrgizilgen reıd barysynda Taraz qalasy boıynsha 8 zańbuzýshylyq tirkelgen. "Máselen, reıd barysynda oblys ortalyǵyndaǵy "Sálem" kafesi qyzmetkerleriniń medısınalyq qolǵapsyz qyzmet kórsetip júrgendigi, kelýshilerdiń jaǵdaıy men medısınalyq maskalarynyń tekserilmeıtindigi anyqtaldy. Jalpy, qalada sanıtarlyq talaptardyń tolyq oryndalmaı otyrǵandyǵyna kóz jetkizdi", deıdi qala ákiminiń orynbasary.
Sonymen qatar, Taraz qalasyna qarasty "Za lınıeı" aımaǵyndaǵy azyq-túlik dúkenderi men kólik jýý oryndarynda da zańbuzýshylyqtar oryn alǵan. Sondaı-aq, "Loto club" oıyn-saýyq mekemesiniń ákimshiligi hattamany rásimdeýden bas tartqan. Bul rette Taraz qalasynyń ákimi Aıtqazy Qarabalaev kezekti brıfıng kezinde turǵyndarǵa jáne kásipkerlerge azamattardyń tártibi men qaýipsizdigin qamtamasyz etý qajettigine baılanysty shekteýlerge túsinistikpen qaraýdy suraǵan bolatyn. Sebebi, búgingi tańda koronavırýs indetin juqtyrǵandar sany Jambyl oblysynda 600-ge jetse, onyń basym bóligin Taraz qalasy qurap otyr. Kún sanap kóbeıip kele jatqan indettiń beti qaýipti. Sondyqtan da árbir jekelegen turǵyndardan bastap, túrli nysandardyń ıeleri men qyzmetkerleriniń de sanıtarlyq talaptardy qatań saqtaǵany durys-aq. "Atap aıtqanda, qoǵamdyq tamaqtaný oryndaryna kelýshiler sany 50 adamǵa deıin bolýy kerek. Mundaı nysandardyń jumys ýaqyty túngi saǵat 22:00-ge deıin shektelgen. Al, jumys istep jatqan bıznes sýbektileri qatań talaptardy saqtaýy kerek", deıdi Ashat Esenǵalıev.
"Aýrý batpandap kirip, mysqaldap shyǵady" degen sóz bar. Koronavırýs indetiniń qaýipti ekenin sala mamandary aıtyp ta, jazyp ta júr. Sondyqtan búgingideı jaǵdaıda karantın talaptaryn saqtaýdyń mańyzy zor. Bul jerde birinshi kezekte tabys emes, taǵdyr turǵany abzal. Búginde Taraz qalasynyń kóshelerinde ınfeksııanyń taralýyn boldyrmaý maqsatynda kún saıyn jappaı dezınfeksııalyq jumystary júrgizilýde. Sońǵy eki kúnniń ózinde mamandar arnaıy 9 birlik tehnıkany paıdalana otyryp, 2 mıllıon 175 myń sharshy metr jerdi zalalsyzdandyrǵan. Onyń ishinde 67 kóshe, túrli áleýmettik nysandardyń aýmaqtary, balalar alańdary, saıabaqtar sııaqty oryndar bar. Biraq, karantın talaptaryn saqtaýdy árbir adam ózinen bastamasa, jumys istep turǵan nysandar adamdardyń densaýlyǵyna beı-jaı qaraıtyn bolsa, kún saıyn júrgizilip jatqan dezınfeksııanyń da, oblys deńgeıinde qabyldanyp jatqan sharalardyń da paıdasy shamaly.
Jambyl oblysy