Osydan 2 jyl buryn belgili túrkitanýshy ǵalym Serikbaı Qosanov Qyzylordanyń Araly men Aqtóbeniń Shalqary arasynda ósip turǵan qaraǵaı ormanyn vıdeoǵa túsirip, biraz jurtty tańǵaldyryp edi. Qalyń qumnyń arasynda jaıqalyp turǵan qaraǵaı «Qyzylordanyń qumyna eshteńe óspeıdi!» dep kesip-piship aıtýǵa qumar biraz aǵaıynnyń aptyǵyn basqan bolatyn. Tipti osydan keıin biraz adamnyń kókeıinde «Shalqarda shyqqan qaraǵaıdy ózimizde nege kórmeske» degen oıdyń qylań bergeni de ras edi. Sol qaraǵaıdyń kóz jeter jerdiń bárin jota-jota qum basqan Qaraqumda ósip turǵanyn kórgende joǵymyzdy tapqandaı qýandyq-aý...
Taýly jerdiń taza topyraǵyna shyǵatyn shikámshil qyr qaraǵaıyn qum arasyna ákelip tikken osy aýyldyń baıyrǵy turǵyny Amanjol Jumabekov aqsaqal eken.
– Osydan 10 jyl buryn batys óńirge sapardan qaıtyp kele jatyp, Qandyaǵashtan qaraǵaıly alqap kórdim. Sodan keıin-aq osy aǵashty Qaraqumǵa ákelip egý týraly oı maza bermedi. Ádepkide Aqtóbedegi tuqymbaqtan alyp kelgen kóshetterimdi kóktep kele jatqanda bilmestikpen «óltirip» aldym. Osydan 5 jyl buryn sol óńirden 10, byltyr 46 túp kóshet jáne ákeldim. Sodan qazir aýlamda 18 túp qaraǵaı ósip keledi, – deıdi aqsaqal.
Qazir kádimgideı boı alyp ósip turǵan qaraǵaı Aqtóbeniń Oıylyna Kókshetaýdaǵy Býrabaıdan jetkizilipti. Aqsaqaldyń aıtýynsha endi boı alyp kele jatqanynda sýyn ýaqtyly berip, kúnnen tasalasa taý qaraǵaıy qumǵa tez jersinedi eken. Qazir osydan bes jyl buryn egilgen taldyń bıiktigi 3 metrden asyp qalǵan.
Amanjol aqsaqal esik aldyn kógertý úshin arnaıy uńǵyma qazdyryp, jemis aǵashtaryn da otyrǵyzypty. О́rigi men shabdalysy bıyl alǵashqy ónimin bermek. Odan bólek baý-baqshalyq alqaby da jaıqalyp túr.
Qum arasyn abat baqqa aınaldyrǵysy keletin qarııanyń ábden izdengeni baıqalady. Ol aldaǵy ýaqytta taǵy 50 shaqty kóshet ákelip, osy mańdy qaraǵaıly ormanǵa aınaldyrýdy josparlap otyr.
Qyzylorda