Almaty oblysynda ózderin órt sóndirýshiler retinde tanystyrǵan alaıaqtar ustaldy. Bul týraly IIM baspasóz qyzmeti habarlady, - dep jazady Egemen.kz
Er azamat pen áıel adam árdaıym bir qylmystyq shema boıynsha áreket etken. Olar azyq-túlik dúkenderine tekserispen kelip, onǵa jýyq dúken ıesin aldap ketken.
Eskeldi aýdany polısııa bóliminiń kezekshi bólimine aýdandaǵy aýyldardyń biriniń 46 jastaǵy azyq-túlik dúken ıesi eki belgisiz adamǵa qatysty shara qoldaný týraly aryzdanǵan. О́zderin órtke qarsy qyzmet qyzmetkerleri retinde tanystyrǵan kúdiktiler aldaý jolymen dúken ıesiniń aqshalaı qarajatyn ıemdenip ketken.
"Qazirgi tańda jaqyn mańdaǵy aýyldardan taǵy birneshe aldanǵan dúken ıeleri anyqtaldy. Aldanǵandar tizimi áli de ulǵaıýy múmkin. Qylmystyq “dýet” árqashan bir shema boıynsha áreket etken. О́zderin órtke qarsy qyzmet qyzmetkerleri retinde tanystyrǵan kúdiktiler, fotosýretteri men mórleri bar qyzmettik kýálikterin zardap shegýshiler naqty tanysa almaıtyndaı kórsetip, birden tekserýge kirisip, túrli zań buzýshylyqtardy taba bastaǵan. Keıbirinde órt sóndirý quraldary bolmaǵan, al ózgelerinde órt sóndirgishterdiń merzimi ótip ketken. Olar tipti peshpen jylytý orny aǵash konstrýksııalarynyń ottan qorǵaý quraldarymen sińdirilmeýine jáne odan ózge máselelerge qatysty zań buzýshylyqtardy tapqan. Sodan keıin máseleni beıbit túrde, hattama jasamaı sheshýdi usynyp, jábirlenýshilerdi aqsha berýge ıtermelegen. Qalaǵandaryn alǵannan keıin olar óz betimen kete barǵan", deıdi Almaty oblysy Eskeldi aýdany polısııa bóliminiń bastyǵy Janat Qudaıbergenov.
Alaıaqtardy anyqtaý úshin tájirıbeli qyzmetkerlerden jedel-tergeý toby qurylyp, kúdiktiler qysqa ýaqyt aralyǵynda Almaty qalasynyń kóshelerinen ustaldy. Kúdiktilerdiń Sarqan aýdanynyń 35 jastaǵy jáne Taraz qalasynyń 26 jastaǵy turǵyny ekeni anyqtaldy. Olar ońtústik astanada jaldamaly páterde birge turǵan. Ustalǵan adamdar ýaqytsha ustaý oqshaýlaǵyshyna qamaqqa alyndy. Sotqa deıingi tergeý amaldary barysynda ustalǵandardyń oblys aýmaǵyndaǵy basqa da uqsas qylmystarǵa qatystylyǵy tekseriledi. Qylmystyq is QR QK 190-baby 3-b. 4-t. boıynsha tergelip jatyr.