Qazaqstan Prezıdenti Qasym-Jomart Toqaev birqatar memlekettiń elshilerinen senim gramotalaryn qabyldady. Bul týraly Aqordanyń baspasóz qyzmeti habarlady.
Aqorda rezıdensııasynda birqatar memlekettiń jańadan taǵaıyndalǵan tótenshe jáne ókiletti elshileriniń Qazaqstan Prezıdentine senim gramotalaryn saltanatty túrde tapsyrý rásimi ótti.
Memleket basshysyna Brazılııa Federatıvtik Respýblıkasynyń elshisi Rýbem Antonıo Korrea Barboza, Oman Sultanatynyń elshisi Muhammed ben Abdýlla ben Salıh Ál-Bahranı, Koreıa Respýblıkasynyń elshisi Ký Hong-sok senim gramotalaryn tapsyrdy.
Qasym-Jomart Toqaev elshilerdi Qazaqstandaǵy dıplomatııalyq jumystarynyń bastalýymen quttyqtap, olarǵa tabys tiledi.
"Sizderdiń elderińizben aradaǵy qarym-qatynasymyz joǵary deńgeıde. Osy múmkindikti paıdalana otyryp, sizderdiń memleketterińizdiń basshylaryna sálem joldaımyn. Elderimiz arasyndaǵy ózara yqpaldastyqtyń odan ári damýyna úles qosasyzdar dep senemin. Sizder búkil álem pandemııadan zardap shegip jatqan qıyn-qystaý ýaqytta bizdiń elimizge keldińizder. Qazaqstan bul qaýipti dertti jeńý úshin der kezinde sheshim qabyldap jatyr. Bul ońaı jumys emes. Biraq biz halyqaralyq yntymaqtastyqqa arqa súıeımiz, BUU-nyń is-áreketterin qoldaımyz. Sonymen qatar álemdegi barlyq el kúsh biriktire otyryp, atalǵan dertti jeńedi dep úmittenemiz", – dedi Prezıdent.