Keshe Premer-Mınıstr Kárim Másimov Úkimet janyndaǵy Kásipkerlik máseleleri jónindegi biregeı úılestirý keńesiniń alǵashqy otyrysyn ótkizdi, dep habarlady Premer-Mınıstrdiń baspasóz qyzmeti.
Onyń jumysyna ortalyq atqarý organdarynyń, Ulttyq banktiń (G.Marchenko), QQA-nyń (E.Bahmýtova), “Samuryq-Qazyna” qorynyń (Q.Kelimbetov), sondaı-aq Qazaqstan Qarjygerleri assosıasııasynyń (S.Ahanov), Qazaqstan Kásipkerleri forýmynyń (R.Batalov), “Atameken” odaǵynyń (A.Perýashev), Qazaqstan Respýblıkasy Saýda-ekonomıkalyq palatasynyń (E.Qojasbaı), Qazaqstan un tartýshylar odaǵynyń (N.Smaǵulov), sol sııaqty salalyq jáne óńirlik bıznes qaýymdastyqtardyń basshylary qatysty.
Kásipkerlik máseleleri jónindegi úılestirý keńesi Memleket basshysynyń tapsyrmasy boıynsha Qazaqstan Respýblıkasynyń 2020 jylǵa deıingi strategııalyq damý josparyn, eldi údemeli ındýstrııalyq-ınnovasııalyq damytý baǵdarlamasyn jáne “Bıznestiń jol kartasy-2020” baǵdarlamasyn tıimdi júzege asyrý maqsatynda qurylǵan bolatyn. Keńes buryn qalyptasqan qarym-qatynastar tetigin saqtap jáne sabaqtastyqty qamtamasyz ete otyryp, daǵdarysqa qarsy keńestiń, ákimshilik kedergilerdi joıý jónindegi komıssııanyń jáne bıznesti júrgizý jónindegi jumys tobynyń fýnksııalaryn ózine biriktirip otyr.
Birinshi otyrysqa qatysýshylar úılestirý keńesiniń jumys josparyn qoldady, sonymen birge, onyń qyzmetiniń uıymdyq máselelerin talqylady.
Onyń syrtynda “Bıznestiń jol kartasy-2020” baǵdarlamasynyń jobasy qaralyp, talqylaý barysynda ony júzege asyrýdyń usynylǵan keshendi sharalaryna bútindeı alǵanda qoldaý bildirildi.