Qazaqstan kásipqoı fýtbol lıgasy (QKFL) jáne «Qazaqstan» respýblıkalyq teleradıokorporasııasy OLIMPBET-fýtboldan Qazaqstan Chempıonatynyń barlyq oıynyn «Qazsport» telearnasynda kórsetýge ýaǵdalasty.
Osylaısha telearnanyń tikeleı efırinde ár týrdyń birneshe oıynyn kórsetý josparlanǵan. Al tikeleı efırge shyqpaǵan kezdesýlerdi live rejiminde qazsporttv.kz saıtynda jáne Qazaqstan.tv mobıldi qosymshasy arqyly kórýge bolady, keıin bul oıyndar telearna efırinde qaıtalanady.
Budan bólek, jankúıerler «Qazsport» telearnasynda Chempıonattyń ár týry aıaqtalǵannan keıin tikeleı efırde qazaqstandyq fýtbol týraly saraptamalyq tok-shoý kóre alady.
«Qazsport» telearnasynyń dırektory Naǵı Baqytbekov otandyq fýtboldy kórsetýdiń aldaǵy josparlaryn aıtty:
– «Qazsport» arnasynyń týǵan kúni qarsańynda OLIMPBET-fýtboldan Qazaqstan Chempıonatynyń barlyq oıyndary bizdiń telearnanyń tikeleı efırinde kórsetiletinin habarlaý – biz úshin qýanysh. Bul birinshiden, elimizdegi kóptegen fýtbol jankúıerleriniń suranysy, tilegi negizinde qolǵa alynsa, ekinshiden álemdik pandemııa kezinde stadıondarǵa baryp qoldaý kórsete almaıtyn barsha sportsúıer qaýymǵa úlken syı dep bilemiz. Eger týrdaǵy kezdesýler bir ýaqytta ótip nemese oıyndar kezinde tikeleı efırde úlken halyqaralyq is-shara kórsetilip jatsa, fýtbol oıyndarynyń kórsetilimi resmı ınternet-saıtta júrgiziletin bolady. Sonymen qatar biz aldaǵy týrdan bastap, barlyq oıyndar aıaqtalǵannan keıin tikeleı efırde fýtbolsúıer qaýym nazaryna saraptamalyq baǵdarlama usynamyz. Sport jankúıerlerin aldaǵy ýaqytta sapaly jáne suranysqa saı kontentpen qýantamyz degen oıdamyn, – deıdi ol.