Tártip saqshylary birqatar qatań shekteý sharalaryn buzý faktilerin anyqtady. Bul týraly Nur-Sultan ákimdiginiń resmı saıtyna silteme jasaı otyryp Egemen.kz habarlaıdy.
"Polısııaǵa túnde belgisiz bireýler Saraıshyq kóshesinde 50-ge jýyq adam jınalǵan kesh ótkizgeni týraly habarlaǵan. Tekserý barysynda polıseıler 28 jastaǵy qala turǵynynyń jabyq kesh uıymdastyrǵany anyqtaldy", dep habarlady Nur-Sultan qalalyq polısııa departamentiniń baspasóz qyzmeti.
Jaǵdaıdy túsindirý úshin bári Esil aýdandyq polısııa basqarmasyna jetkizildi. Tekserý nátıjesi boıynsha 42 adam temeki buıymdary men elektrondy temekini qoǵamdyq oryndarda paıdalanýǵa tyıym salýdy, tynyshtyqty buzǵany, alkogol ishimdikterin tutynǵany úshin, bir adam – Qazaqstanda tirkeýsiz nemese jeke basyn kýálandyratyn qujattarsyz turǵany úshin jaýapqa tartyldy.
"Atalǵan fakti boıynsha túsinikteme bergen keshtiń uıymdastyrýshysy polısııaǵa óziniń buryn sanıtarlyq-epıdemııalyq normalardy buzǵany úshin qyzmeti toqtatylǵan elordalyq kafelerdiń birinde jumys istegenin túsindirdi. Sondyqtan ol kottedjdi jalǵa alyp, jabyq kesh ótetin orynnyń meken-jaıyn áleýmettik jeli arqyly aldyn-ala habarlap, kelýshilerdi qabyldaǵan", dedi polısııa qyzmetkerleri.
Turǵyndardyń sanıtarlyq-epıdemııalyq qaýipsizdigin saqtaý týraly zańnama talaptaryn, sondaı-aq gıgıena standarttaryn buzǵany úshin jalǵa alýshyǵa qatysty jınalǵan materıaldar prosessýaldyq sheshim qabyldaýǵa taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
Al polısııa men Nur-Sultan ákimdiginiń ókilderi 20:00-den keıin elordanyń oıyn-saýyq nysandaryna birlesken reıd júrgizdi. Tekserýler kórsetkendeı, qatań karantındik shekteý sharalary engizilgenine qaramastan, keıbir mekemeler jumysyn jalǵastyrǵany anyqtaldy.
Karantınniń buzylýynyń barlyq faktileri boıynsha materıaldar atalǵan mekemelerdiń ıelerin jaýapqa tartý úshin taýarlar men kórsetiletin qyzmetterdiń sapasy men qaýipsizdigin baqylaý basqarmasyna tapsyryldy.
Nur-Sultan qalalyq polısııa departamenti azamattardy qoǵamdyq oryndarda jaýapkershilik tanytyp, sanıtarııa normalaryn saqtaýǵa, sondaı-aq karantın sharalary kezinde polısııa qyzmetkerleriniń talaptaryna túsinistik tanytýǵa shaqyrady.
Indettiń taralýynyń aldyn alý maqsatynda polısııa karantın rejimin saqtaý jáne jeke qorǵanys quraldaryn paıdalaný qajeti týraly turǵyndarmen profılaktıkalyq suhbat júrgizedi. Mundaı áńgimelesýler azamattardy maska taǵý tártibin saqtaýǵa májbúrleý sharalaryn qoldanýdan góri tıimdirek.
Sonymen qatar polısııa oıyn-saýyq, qoǵamdyq tamaqtaný oryndary, monshalar, saýnalar, attraksıondarǵa baryp, olardyń ıelerine qoldanystaǵy karantın sharalary týraly eskertedi. Quqyq buzýshylar qoldanystaǵy zańnamaǵa sáıkes jaýapqa tartylady.