Qazaqstannyń Syrtqy ister mınıstri Muhtar Tileýberdi "Ortalyq Azııa - Qytaı" joǵary deńgeıdegi birinshi otyrysyna qatysty. Beınekonferensııaǵa sondaı-aq Qytaı, Qyrǵyzstan, Tájikstan, Túrikmenstan jáne О́zbekstan syrtqy saıası vedomstvolarynyń basshylary qatysty. Bul týraly Egemen.kz Syrtqy ister mınıstrliginiń baspasóz qyzmetine silteme jasap habarlaıdy.
Is-shara barysynda mınıstrler halyqaralyq jáne óńirlik kún tártibindegi birqatar ózekti máseleler boıynsha pikir almasty.
Qatysýshylar Ortalyq Azııa memleketteri men Qytaı arasyndaǵy dostyq, tatý kórshilik jáne ózara tıimdilik negizinde kópjosparly yntymaqtastyqty jandandyrý ortaq múddelerge jaýap beretinin, óńirdegi ekonomıkalyq ósý men qaýipsizdiktiń mańyzdy faktory bolyp tabylatynyn atap ótti.
Pandemııamen kúreste tyǵyz ózara is-qımyl jasaý, onyń teris saldaryn joıý jáne óńir elderiniń ekonomıkasyn qalpyna keltirý máselelerine birinshi kezekte nazar aýdaryldy. Qazaqstan kórsetilgen gýmanıtarlyq kómek pen pandemııamen kúreste jan-jaqty qoldaý kórsetkeni úshin Qytaı tarapyna rızashylyǵyn bildirdi.
Otyrysqa qatysýshylardyń pikirinshe, COVID-19 keń taralýynyń aldyn alý boıynsha májbúrli sharalar ishki aımaqtyq mobıldiktiń jáne syrtqy ekonomıkalyq qyzmettiń aıtarlyqtaı tómendeýine ákeldi. Taraptar aımaqtyq ekonomıkalyq ıntegrasııany ilgeriletýde, saýdany jandandyrýda jáne ózara ınvestısııalardy yntalandyrýda kúsh-jigerdi biriktirýdi qoldady.
Shekaralarda sanıtarlyq-karantındik sharalardyń qoldanylýy jaǵdaıynda júk tasymaly men taýarlardyń tranzıti erekshe mańyzǵa ıe boldy. Qytaı tarapy bizdiń elderimizdiń ekonomıkalarynyń ózara baılanysyn eskere otyryp, transshekaralyq júk aǵynyn úzdiksiz qamtamasyz etý maqsatynda Ortalyq Azııa seriktesterine "jasyl dálizderdi" uıymdastyrýǵa daıyn ekenin málimdedi. Ortalyq Azııa men Qytaıdyń syrtqy saıası vedomstvolarynyń basshylary sıfrlandyrý, qarjy qyzmetteri, elektrondyq kommersııa, aqyldy qalalar jáne basqa da «noý-haý» sııaqty ósý draıverleri boıynsha kooperasııa múmkindikterin talqylady.
Ǵylymı-qoldanbaly salada, atap aıtqanda, ǵylymdy qajetsinetin ónim shyǵarý, sondaı-aq farmasevtıkalyq saladaǵy kooperasııany damytý boıynsha yntymaqtastyqty jolǵa qoıýǵa ázirligi atap ótildi.
Syrtqy ister mınıstrleri "Ortalyq Azııa – Qytaı" formatyn bekitý týraly sheshim qabyldap, turaqty kópjaqty saıası dıalogty jalǵastyrýdy qoldady.