Kóp kómegi keseldiń betin qaıtarady

Jýrnalıster járdemi

Derttiń dendemeýine barlyq sala ókilderiniń úlesi bar. Osy baǵyt­taǵy sharalardy nasıhattap júrgen jýrnalıster de qaıy­rym­dylyq sharalarynan shet qal­ǵan joq. Oblystyq ishki saıa­sat basqarmasyna qarasty «Syr medıa» seriktestiginiń ujy­my koro­na­vırýsqa qarsy kú­res­ke bir kúndik jalaqysyn aýdar­dy.

Áriptesterimizdiń birkúndik ja­la­qysynan jınalǵan qarjy 1 mln teńgege jýyqtapty. Oǵan ob­lys­tyq medısına ortalyǵy ottegi apparatyna qajetti qural­dar­dy satyp alǵan. Jaqsylyq ja­saýǵa jumylǵan jýrnalıster ara­s­ynda eriktiler qatarynda emdeý mekemelerine kómek kórsetip júr­gender de joq emes.

Osy aı basynan beri serik­tes­­tiktiń 3 qyzmettik kóligi qala aýma­ǵyndaǵy emhanalarǵa, aýrý­ha­nalarǵa ottegi ballondaryn jet­ki­zý­­men aınalysyp júr.

Qurylysshylar qaıyrymdylyǵy

Jýyrda aımaqtaǵy qurylys­shy­lar assosıasııasy koronavırýs dertimen kúresip júrgen dári­gerlerge 32 ottegi konsentratoryn alyp berdi. 16 qurylys kompa­nııa­synyń kómegimen alynǵan qurylǵylardyń 10-y oblystyq juqpaly aýrýlar aýrýhanasyna,7-i qalalyq aýrýhanaǵa, 15-i aýdan­dar­daǵy emdeý mekemelerine tabystaldy.

Jalpy, qaıyrymdylyq sharalaryna úles qosyp jatqandardyń qatary qalyń. О́tken apta sońynda «Shalqııa Sınk LTD» JShS kásipornynyń demeýshiligimen Jańa­qorǵan aýdanaralyq aýrý­ha­­nasynyń juqpaly aýrýlar bóli­min­degi provızorlyq stasıo­nar­ǵa VG70 markaly 2 jasandy tynys alý qondyrǵysy jetkizildi. Bul medısınalyq apparat elektr qýaty sóngen jaǵdaıda akkýmý­lıator arqyly 30 mınýtqa deıin istep turady. Sondaı-aq kásiporyn ókilderi dárigerlerge arnaıy saq­tyq qorǵanysh kıimderin, pýlsoksımetr men dári-dármekter tabys­tady. Jaqyn kúnderi aýrýhana bergen tizim boıynsha óte qajetti preparattar taǵy jetkiziledi.

Kásipkerler de eriktiler qatarynda

Qaıyrymdylyq sharalaryna úles qosýmen qatar eriktiler sapynda eńbek etip júrgen isker azamattar da bar. Qınalǵan jurtqa qol ushyn berýdi paryz sanaıtyn kóbi ózderiniń attary atalǵanyn da qalamaıdy. Iskerlerdi ıgi iske jumyldyrýda oblystyq kásip­ker­lik palatasy júıeli jumys istep otyr.

– Qazirgi jaǵdaı qaı salaǵa da jeńil bolyp turǵan joq. Bıznes ókilderi shash-etekten shyǵynǵa batqanyna qaramastan turǵyndarǵa kómek qolyn sozyp jatyr. Sonyń bir aıǵaǵy, keıingi aıda «Abaı-Dáýlet» JShS, «Abzal jáne K» TS, «Aqtóbe ı K» JShS, «Shyńǵys LTD» JShS, «KVANT» JShS naýqastar men medısına mekemelerin tegin dári-dármekpen, qajetti ottegi qu­raldarymen, ony tasıtyn kólikpen, azyq-túlik­pen qamtamasyz etip jatyr. «Qyzylorda», «Báı­terek» qonaq­úılerinde medısına qyzmet­ker­leri tegin jatyn oryn men ta­maq­pen qamtamasyz etilýde, – deıdi oblystyq kásipkerler palatasy dırektorynyń orynbasary Pirmuhammed Syzdyqov.

Qyzylorda oblysy