Keshe Premer-Mınıstrdiń orynbasary Erbol Orynbaev jumys babymen Mańǵystaý oblysynda boldy. Ol Aqtaýda respýblıka boıynsha birinshi ret salynǵan oralmandardy beıimdeý jáne kiriktirý ortalyǵynyń ashylý saltanatyna qatysty. 2008 jyldyń aıaǵynda qurylysy bastalǵan bul nysanǵa 1,8 mlrd. teńge qarajat baǵyttalypty. Onyń ashylý saltanatynda oblys ákimi Qyrymbek Kósherbaev aımaqqa 1991-2010 jyldary 98887 adam kelgendigin, al “Nurly kósh” baǵdarlamasyna oraı 2010-2011 jyldary 5400 oralman kútilýde ekendigin jetkizdi. Ortalyqta 2 jeti qabatty jataqhana jáne ákimshilik ǵımarat bar. Ol 200 oralman otbasyn 5-6 aı merzimge ýaqytsha qabyldaýǵa eseptelgen. Oǵan ornalasatyn ár oralman otbasy kelisim-shartqa otyrady. Olarǵa til úıretý, kásibı mamandyqqa baýlý, eldiń negizgi zańnamalaryna oqytý, kásipkerlikpen aınalysý, jumysqa ornalastyrý jáne basqa da qyzmetter kórsetiledi. Ortalyqta mádenı-turmystyq qyzmet kórsetý oryndary da ashylmaqshy.
Sondaı-aq E.Orynbaev Aqtaýda 280 oryndyq balabaqshanyń ashylýyna da qatysty. Oblysta Elbasy tapsyrmasyna oraı mektepke deıingi bilimmen qamtýdy jaqsartý qolǵa alynýda. Oǵan osy jyly ǵana 10 balabaqsha qurylysy bastalyp, 10 balabaqshany qalpyna keltirý jumystary júrip jatqany dálel. Al jyl aıaǵynda balabaqshamen qamtylý deńgeıi 70 paıyzǵa jetpekshi. Jumys saparynda vıse-premer Aqtaýdaǵy joǵary oqý oryndary, densaýlyq saqtaý jáne mádenıet oshaqtary men jańadan iske qosylǵan saýda oryndaryn aralap kórdi. Sondaı-aq oblystyń áleýmettik salasyn odan ári damytý jáne “Bıznestiń jol kartasy-2020” baǵdarlamasyn júzege asyrý máselesine arnalǵan keńes ótkizdi.
Jolaman BOShALAQ.
AQTAÝ.