Petropavldyń Semashko kóshesinde turatyn 54 jasar turǵynynyń quny 130 myń teńge turatyn "Phoenix" markaly velosıpedin qymqyrǵan sýyq qoldy iz sýytpaı, jedel ustaldy. Oǵan jaqyn aradaǵy aýlalardyń birinde turǵan beınekameranyń kómegi tıdi. Qos dóńgelekti tulparynyń qoldy bolǵanyn kórgen Qyzyljardyń 54 jasar turǵyny "102" nómirine jedel habarlaǵan, - dep jazady Egemen.kz
Polısııa qyzmetkerleri shamamen urlyq bolǵan ýaqytty beıneden baqylaǵanda velosıped jetelep, asyǵa basyp bara jatqan qaskóıdi birden kóredi. Ol jaqyn mańda turatyn 1972 jyly týǵan qala turǵyny bolyp shyqty. Beınekameradaǵy ketken baǵdarymen jedel jetken polıseıler ony masań kúıinde ustap, velosıpedti ıesine qaıtaryp, urynyń ústinen qylmysty is qozǵady. Qazir oǵan kelýi týraly mindetteme túrindegi bultartpaý sharasy qoldanylǵan.
Polıseılerdiń jedel jumysyna razy bolǵan ıesi «kún saıyn jumysqa jáne saıajaıǵa minip baryp júrgen asyraýshymdy taýyp bergenderińizge rahmet» dep alǵysyn jaýdyrýda. «Velosıped ıeleri qaýipsizdik sharalaryn kez kelgen jaǵdaıda saqtaýlary tıis. Az ýaqytqa qaldyrsa da velosıpedin urlap áketýge qarsy berik trospen bekitip ketkenderi jón. Múmkindiginshe beınekameranyń baqylaýyndaǵy oryndardy tańdaǵan durys. Tájirıbe kórsetkendeı, qaskóıler mundaı jerlerdi aınalyp ótedi, sonymen birge beınejazbalar qylmysty tez ashýǵa múmkindik beredi», - dep atap ótti Petropavl qalasynyń PB bastyǵy, polısııa polkovnıgi Jandos Muqatov.
Sondaı-aq qyzyljarlyqtar ózderiniń qos dóńgelekti kólikterin qalaýy boıynsha polısııanyń málimetter bazasynda tirkeı alady. Ol urlyqty tez arada ashýǵa múmkindik beredi. Búgingi tańda atalmysh bazaǵa 1116 velosıped tirkelgen.
QYZYLJAR