Ortalyq saılaý komıssııasynyń (OSK) kezekti otyrysynda 12 tamyzda ótetin Parlament Senaty depýtattarynyń saılaýyna daıyndyq máselesi qaraldy.
Jıynǵa vıdeobaılanys arqyly oblystardyń, Nur-Sultan, Almaty jáne Shymkent qalalarynyń aýmaqtyq saılaý komıssııalary jáne onlaın rejimde BAQ ókilderi qatysty. OSK tóraǵasy Berik Imashev 10 tamyzda saǵat 00:00-de kandıdattardyń saılaýaldy úgit jumysy aıaqtalǵanyn málimdedi. Osylaısha kúntizbelik josparǵa sáıkes daýys berý kúnin uıymdastyrýmen jáne ótkizýmen baılanysty barlyq saılaýaldy is-sharalar aıaqtalady. Osyǵan baılanysty oblystardyń, Nur-Sultan, Almaty jáne Shymkent qalalarynyń aýmaqtyq saılaý komıssııalary tóraǵalarynyń daýys berý kúnine daıyndyq barysy tyńdaldy.
Saılaý komıssııalarynyń usynǵan málimetterine sáıkes saılaý bıýlletenderine 46 kandıdat engizildi (tirkeýden keıin 12 kandıdattan kandıdatýralaryn alyp tastaý týraly ótinish túsken). Shyǵys Qazaqstan oblysynan 4 kandıdat, Aqmola, Atyraý, Batys Qazaqstan, Qaraǵandy, Qostanaı, Qyzylorda jáne Pavlodar oblystary, Nur-Sultan, Almaty, Shymkent qalalarynan 3 kandıdattan jáne qalǵan óńirlerden 2 kandıdattan tirkelgen. Respýblıka boıynsha tańdaýshylar tizimine 3069 máslıhat depýtaty engizilgen.
Berik Imashev aımaqtardaǵy sanıtarlyq-epıdemııalyq jaǵdaıdy eskere otyryp, saılaý prosesiniń sanıtarlyq qaýipsizdigin qamtamasyz etý úshin barlyq qajetti sharalar qabyldanǵanyn atap ótti. Budan basqa, saılaý kúni OSK-nyń ınternet-resýrsy arqyly tańdaýshylardy tirkeýdi jáne daýys berýdiń aldyn ala qorytyndylaryn shyǵarýdy onlaın baıqaý servısteri jumys isteıtin bolady, bul saılaý prosesiniń ashyqtyǵy men jarııalylyǵyn qamtamasyz etpek.