Soltústik Qazaqstan oblysynda 2397 kól bar, sonyń 332-si jalǵa berilgen. Bular balyǵy kóp, sýy tushy, qunarly, úlken kólder. Bul kólderden ruqsat qujattary bolǵan jaǵdaıda ǵana balyq aýlaýǵa bolady. Jýyrda SQO tabıǵatty qorǵaý polısııasy ań aýlaý sharýashylyǵy qyzmetkerlerimen jáne basqa da múddeli vedomstvolarmen birlese otyryp osy kólder men qoryqtarda, ormandarda tabıǵatty qorǵaý zańnamasyn saqtaý boıynsha reıd júrgizdi, - dep habarlaıdy Egemen.kz.
Oblysta "Qyzyl kitapqa" engizilmegen ańdar men qustardy aýlaýǵa ǵana ruqsat etilgen. Al ań aýlaý sharýashylyǵy aýmaǵyna arnaıy ruqsat bolǵan jaǵdaıda ǵana barýǵa bolady. Oblysta ondaı sharýashylyqtardyń sany – 37. Bulardan basqa alty qoryqta jáne "Kókshetaý" ulttyq parki aýmaǵynda ań aýlaýǵa tyıym salynǵan.
Sońǵy reıdti qosa eseptegende jyl basynan beri tabıǵatty qorǵaý zańnamasynyń 658 quqyq buzýshylyǵy anyqtalǵan. Onyń ishinde – 378 janýarlar dúnıesi salasynda, 226-sy balyq aýlaý salasynda jáne ósimdikter álemi boıynsha – 9. Ekologııalyq qylmys faktileri boıynsha 5 qylmystyq is sotqa joldandy, taǵy 8-i óndiriste jatyr. Keltirilgen shyǵyn somasy 13 mln. teńgeden asady. Brakonerlerden 21 sibir eliginiń, 2 maraldyń tutas eti jáne 3 aqqýdyń eti alyndy. Sondaı-aq, 3 tehnıka men 8 myltyq alyndy.
Soltústik Qazaqstan oblysy