Taıaýda ortalyq kommýnıkasııalar qyzmetiniń alańynda «Báıterek» UBH» AQ Basqarma tóraǵasynyń orynbasary Rýstam Qaraǵoıshınniń qatysýymen onlaın brıfıng ótti. Baspasóz máslıhatynda negizinen «Bıznestiń jol kartasy-2025» memlekettik baǵdarlamasyn iske asyrý barysy sóz boldy.
Rýstam Qaraǵoıshın sóz basynda «Báıterek» holdıngi óziniń enshiles uıymy – «Damý» kásipkerlikti damytý qory arqyly júzege asyryp jatqan «Bıznestiń jol kartasy-2025» memlekettik baǵdarlamasynyń aralyq nátıjelerine toqtaldy.
– Qazaqstan bıznesi úshin qazirgi kezeń óte qıyn bolyp tur. Koronavırýs pandemııasyna baılanysty májbúrli shekteý sharalarynan bıznes turalap, shyǵynǵa ushyraýda. Mundaı jaǵdaıda «Báıterek» holdıngi shaǵyn jáne orta bıznesti qoldaýǵa basymdyq beredi. Shaǵyn jáne orta kásipkerlerge memlekettik baǵdarlamalar aıasynda da, ózimizdiń baǵdarlamalarymyz aıasynda da kóptegen qoljetimdi quraldardy usynamyz. Bul qoldaý quraldarynyń kóbi «Bıznestiń jol kartasy» memlekettik baǵdarlamasyna shoǵyrlanǵan. «Bıznestiń jol kartasy» Tuńǵysh Prezıdent – Elbasy Nursultan Ábishuly Nazarbaevtyń tapsyrmasy boıynsha 2010 jyldan bastap júzege asyrylyp keledi. Baǵdarlama tıimdiligin dáleldep, qazaqstandyq kásipkerlerdiń naǵyz kómekshisi ekenin tanytty. 2013 jyldan beri «Damý» qory bul baǵdarlamany «Báıterek» holdıngi quramynda júzege asyrýda, – dedi R.Qaraǵoıshın.
Ol «Báıterek» holdıngi eń birinshi kezekte qarjylandyrý qalalyq jáne aýyldyq kásipkerler úshin birdeı qoljetimdi bolýy kerektigin, bul azamattarǵa jańa bıznesin ashyp qana qoımaı, burynǵy kásibin damytýǵa múmkindik beretinin aıtty. Ondaǵy maqsat – óńdeý ónerkásibiniń ónimin ulǵaıtý. Básekege qabiletti jańa óndiristerdi kóbirek quryp, halyqty shaǵyn jáne orta kásipkerlik jumysymen qamtýdy kózdeıtin holdıng bul maqsattarǵa josparǵa saı qol jetkizip keledi.
Qazirgi tańda shaǵyn jáne orta bıznesti qoldaý quraldarynyń ishinde syıaqy mólsherlemesin sýbsıdııalaý quraly suranysqa ıe bolyp otyr. 2020 jylǵy 1 tamyzdaǵy jaǵdaı boıynsha «Damý» qory 2010 jyldan beri baǵdarlamanyń úsh baǵyty boıynsha 2,8 trln teńge somasyna 16311 jobany sýbsıdııalady. Onyń ishinde 2018 jyly jalpy kredıt somasy 173 mlrd teńgege – 1 432 joba, al 2019 jyly jalpy kredıt somasy 154 mlrd teńgege – 2 402 joba qoldaý tapty. Qoldaý kólemi jyl sanap ulǵaıyp keledi.
– Mysaly, «ÚMIT» tomoterapııa jáne ıadrolyq medısına aýrýhanalyq kesheni» JShS bıznesti memlekettiń qoldaýy nátıjesinde Nur-Sultan qalasynda Radıoterapııa jáne ıadrolyq medısına emdeý-dıagnostıkalyq aýrýhana keshenin saldy. Bul Qazaqstan men Ortalyq Azııadaǵy biregeı keshen. Munda onkologııaǵa shaldyqqan naýqastardy tomoterapııanyń jańa zamanaýı ádisi boıynsha «TomoTherapy HD» jabdyǵyn qoldana otyryp emdeıdi. Osy ádis arqyly qaterli isiktiń barlyq túrlerin, tipti qazirgi ýaqytqa deıin radıosáýlelendirý nemese hırýrgııa kómegimen joıý qıyn bolǵan túrlerin de emdeýge bolady. Keshenniń qurylysyn aıaqtaý maqsatynda kompanııa basshylyǵy ekinshi deńgeıdegi bankten jyldyq 13,5%-ben qaryz aldy, onyń 40%-yn memleket «Bıznestiń jol kartasy-2020» sheńberinde sýbsıdııalaıdy, al aıyrmasyn kásipker tóleıdi, kredıt merzimi – 5 jyl. Sýbsıdııalanatyn jobalardyń salalyq qurylymynda óńdeý ónerkásibi (jalpy kredıt somasy 1,2 trln teńgelik 4 444 joba), kólik jáne qoımalaý (somasy 413 mlrd teńgelik 3 629 joba) jobalary basym. Kóterme jáne bólshek saýdadaǵy 286 mlrd teńgelik 2 293 joba, 144 mlrd teńgelik 1 220 aýyl sharýashylyǵy jobasy bar, – dedi Rýstam Qaraǵoıshın.
Onyń aıtýynsha, óńirler arasynda Pavlodar (jalpy kredıt somasy 190 mlrd teńgelik 1 304 joba) jáne Shyǵys Qazaqstan (jalpy kredıt somasy 179 mlrd teńgelik 1 261 joba) oblystary kósh bastap tur. Aqtóbe oblysynda 154 mlrd teńgeniń 1212 jobasy osyndaı qoldaýǵa ıe boldy.
Shaǵyn bıznesti memlekettik qoldaýdyń suranysqa ıe taǵy bir sharasy – «Damý» qory beretin kepildik. Kásipker bıznes ashýǵa nemese keńeıtýge kredıt alatyn kezde kepilzaty jetkiliksiz bolca, osy kepildikti paıdalana alady.
– Bizdiń aldymyzda kásipkerler sanyn arttyrý mindeti tur. Qazir eldiń jalpy ishki ónimindegi shaǵyn jáne orta bıznestiń úlesi 30,8%-dy quraıdy, al 2025 jylǵa qaraı bul kórsetkish 35%-ǵa deıin ósýi tıis. Biz bes jyl ishinde osyndaı úlken serpindi kútýdemiz, – degen Rýstam Qaraǵoıshın kásipkerlerdi jeke bıznesin ashý nemese damytý úshin memlekettik qoldaýǵa júginýden qoryqpaýǵa shaqyrdy.