Búgin Qyzylorda qalasynyń qoǵamdyq-saıası ómirine belsene aralasyp, áleýmettik-ekonomıkalyq damýyna erekshe úles qosqan birqatar azamattar marapat bıiginen kórindi, dep habaorlaıdy Egemen.kz.
Qala ákimi Nurlybek Nálibaev elmen etene júrip, muqtaj jandarǵa kómek qolyn sozǵan jandardy "Jomart júrek" baıqaýynyń qalalyq kezeńiniń qorytyndysy boıynsha marapattady.
Shahar basshysy jomart jandar qalamyzdyń kórkeıýine, áleýmettik-ekonomıkalyq damýyna erekshe úles qosyp qana qoımaı, qashannan qaıyrymdylyq sharalardyń basynan árdaıym tabylyp kele jatqandyǵyn aıtyp, qaıyrymdylyq isterge qoldaý bildirgen jandarǵa alǵysyn bildirdi.
"Jomart júrek" syılyǵy 5 nomınasııa boıynsha tabystaldy. Baıqaýdyń "Týǵan ólke" atalymy "Sát-Servıs" JShS dırektory Roza Imanovaǵa buıyrdy. Roza Sádibekqyzy týǵan jerimizdi túletýge aıryqsha úles qosyp, qalamyzdaǵy 10 kópqabatty turǵyn úıge kúrdeli jóndeý jumystaryn júrgizgen. Sonymen birge qaıyrymdylyq sharalaryna belsene qatysyp, demeýshilik kórsetip keledi.
"Biz kómekti maqtanysh ne marapat úshin jasamadyq. Nıetimiz keıingi urpaqqa úlgi kórsetý", - deıdi Roza Imanova.
Al baıqaý boıynsha "Jyl tulǵasy" nomınasııasy jyl kóleminde qalamyzdyń áleýmettik salasyna turaqty túrde qoldaý kórsetken Qanat Boranbaevqa tabystaldy. Qanat Jomartuly karantın ýaqytynda qalalyq aýrýhana qyzmetkerlerin "Qyzylorda" qonaq úıine tegin ornalastyryp, qajetti turmystyq zattarmen qamtamasyz etti.
"Jyl mesenaty" atalymynda indet ýaqytynda turǵyndarǵa 15 myńǵa jýyq tegin betperde taratqan "DALATEX" JShS dırektory Dilmuhamed Abızov jeńimpaz dep tanylsa, "Jyldyń úzdik uıymy" "El-Araı" qoǵamdyq qory atandy. Qoǵamdyq qor jyl saıyn 1000 otbasyn azyq-túlikpen, 2000 otbasyn kıim-keshekpen, 100 otbasyn kómirmen qamtamasyz etip keledi. "Delıýks" kompanııasymen birigip, 10 myń dana maska, "Shuǵyla" qoǵamdyq qorymen birlesip aımaǵymyzdaǵy aýrýhanalarǵa 200 ottegi konsentratoryn alyp bergen.
Baıqaýdyń "Epen eriktilik" nomınasııasy qoǵam belsendisi Dınara Eshatovaǵa marapattaldy. Qoǵamdyq keńes múshesi, qoǵam belsendisi, Dınara Mamadııarqyzy sport salasyndaǵy volonter-úılestirýshi. Ol eriktilermen birlese otyryp, qala kásipkerleri usynǵan 3000-nan asa betperde taratty. Erikti sonymen birge áleýmettik dúkender men dárihanalarda satylymdaǵy taýarlardyń shektik baǵadan aspaýyn qadaǵalaý maqsatynda monıtorıngtik top quramynda belsendilik tanytyp, erekshe kózge tústi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.