Bıylǵy oqý jylynyń alǵashqy eki toqsany onlaın rejimde oqylyp, oqýshylardyń kóshede júrýi jyldaǵydaı kóp bolmaıtyndyǵyna qaramaı Petropavldyń polıseıleri qalyptasqan dástúrge sáıkes oqý jylynyń qarsańynda jasóspirimdermen profılaktıkalyq jumysty kúsheıtýde, - dep habarlaıdy Egemen.kz.
Ásirese, kámeletke tolmaǵandardyń isteri jónindegi ınspektorlar qazir óz jumystaryn qaýyrt rejimge aýystyrǵan. Reıdtik is-sharalar ótkizip, sondaıdyń birinde ıývenaldyq polıseıler saǵat 23-ten keıin Internasıonalnyı kóshesi boıyndaǵy jaldamaly páterlerdiń birine bas suqty. Páterde on eki adam bolǵan, ústeldiń ústinde spırttik ishimdikter turǵan. Jınalǵandardyń úsheýi ǵana er jetkender.
Polıseıler engizilgen karantındik shekteýlerdi buzǵany úshin olarǵa materıal jınaqtap, sanıtarlyq-epıdemııalyq qyzmetke joldady. Toǵyz jasóspirimniń ata-anasyna balalarynyń túngi ýaqytta úıden tys jerde bolǵany úshin, taǵy bireýine – balasynyń alkogoldik ishimdik ishkeni úshin jaýap berýlerine týra keledi. "Karantındik shekteýler kezeńinde mektepten tys bilim berý uıymdary jumys istemeıdi jáne balalardyń bos ýaqyttaryn ótkizý uıymdastyrylmaǵan", - deıdi Petropavl qalasy PB ıývenaldyq polısııa bóliminiń bastyǵy, polısııa maıory Elmıra Abýsheva. "Iývenaldyq polısııa qyzmetkerleri barynsha problemaly januıalardy nazarlarynda ustaıdy. Aıta ketetini, jalǵa alynǵan páterde anyqtalǵan jasóspirimder buryndary polısııa nazaryna ilikpegen. Bul oqıǵanyń olarǵa sabaq bolatynyna jáne eresek ómirge aıaq basýy jaýapkershilikten bastalatyn esterinen shyǵarmaıdy dep senemiz", deıdi ol.
Karantındik shekteýler jeńildetilgenimen polıseıler, pedagogtar men ata-analar balalardyń bos ýaqyttaryn ótkizýlerine baqylaýdy kúsheıtý qajet ekenin jaqsy túsinýleri kerek. Olardyń birlesken basqosýlardy mindetti túrde spırttik ishimdiktermen ótkizý qajet delinetin ádetteriniń buzylýyna barlyq qoǵamymyz múddeli bolýy kerek deıdi polıseıler.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.