Qazaqstan men Reseıdiń áskerı dárigerleriniń birlesken jumysy Nur-Sultan men Almatydaǵy Qorǵanys mınıstrliginiń áskerı gospıtaldarynda júrgizilýde. Reseılik mamandar COVID-19-dan emdeýdiń qazaqstandyq hattamasyn zerttep, koronavırýstyq ınfeksııasy bar naýqastardy emdeý prosesine qatysady, sondaı-aq juqpaly aýrýlardy dıagnostıkalaý jáne emdeý salasyndaǵy tájirıbelerimen bólisedi.
«Áskerı qyzmetshiler men olardyń otbasy múshelerine keńes berilip, jergilikti jerlerdegi áskerı qyzmetshilerde koronavırýstyq ınfeksııany erte anyqtaýdyń praktıkalyq daǵdylary men ádisterin pysyqtaý jalǵasýda. Koronavırýstyq ınfeksııamen syrqattanýshylyq boıynsha jaǵdaıdy epıdemııalyq baqylaý jáne COVID-19-dy eńsergen pasıentterdi ońaltý jónindegi jumysty jalǵastyrý josparlanýda», dep atap ótti Bas áskerı klınıkalyq gospıtali bastyǵynyń ǵylymı-terapııalyq jumys jónindegi orynbasary, polkovnık Nazgúl Qalkaeva.
Úsh aı ishinde Qazaqstannyń áskerı dárigerleri koronavırýstyq ınfeksııa klınıkasy men onyń asqynýlaryn zerttedi. Qazaqstandyq klınıkalyq emdeý hattamasy men COVID-19 dıagnostıkasy ártúrli klımattyq jaǵdaılarda emdeý erekshelikterin qospaǵanda, reseıliktermen birdeı. Reseı dárigerleri qazaqstandyq áskerı gospıtaldardyń sapaly jabdyqtalýyn jáne mamandardy daıarlaýdyń joǵary deńgeıin atap ótýde.
«Bizdiń kelýimizdiń baǵdarlamasy aıasynda tájirıbe almasý jáne klınıkalyq jaǵdaılardy zertteý boıynsha semınarlar, konferensııalar ótkizý qarastyrylǵan. Sondaı-aq osy jaǵdaıda bir-birine uqsas bolatyn qoldanystaǵy emdeý hattamalary zertteledi jáne salystyrý júrgiziledi. Áriptesterimizben bir apta ishinde jumys isteı kele Qazaqstan Respýblıkasynyń Áskerı-medısınalyq qyzmetiniń óte jaqsy daıyndyǵyna kóz jetkizdik. Olar koronavırýstyq ınfeksııany emdeý máselelerinde ozyq halyqaralyq tájirıbeni qoldanady», deıdi akademık N.N.Býrdenko atyndaǵy Bas áskerı klınıkalyq aýrýhananyń №3 fılıalynyń medısınalyq qyzmet podpolkovnıgi Vadım Pıvovarov.
Ár pasıentti emdeýde jasyna jáne patologııalaryna baılanysty árqaısysynyń jeke erekshelikteri bolady. Máselen, endokrındik patologııasy jáne júrek-tamyr júıesi problemalary bar 50 jastan asqan adam aýrýdy qıyn ótkeredi.
Búgingi tańda Almatydaǵy Áskerı klınıkalyq gospıtalda 800-den astam adam sátti emdeldi. Olardyń 300-i ortasha, aýyr, óte aýyr halde boldy jáne reanımasııa bóliminde kómek aldy. Qazirgi ýaqytta koronavırýstyq ınfeksııasy bar pasıentterdiń sany azaıyp keledi, naýqastardy qalpyna keltirýdiń oń qarqyny bar.
Esterińizge sala keteıik, eki eldiń qorǵanys vedomstvolary basshylarynyń áskerı-medısınalyq yntymaqtastyq týraly kelisimine sáıkes, Qazaqstanǵa COVID-19 koronavırýstyq ınfeksııasy bar pasıentterdi emdeýde tájirıbesi bar reseılik anestezıolog-reanımatologtar, ınfeksıonıster, terapevter toby keldi.