"Uly dalanyń ulyq tulǵasy" úzdik esse baıqaýynyń qorytyndysy belgili boldy, - dep habarlaıdy Egemen.kz.
Elbasy kitaphanasy Shyǵystyń uly ǵalymy, fılosof, matematık, mýzyka teoretıgi Ábý Nasyr ál-Farabıdiń 1150 jyldyǵyna oraı jalpy bilim beretin astana mektepteriniń 7-11 synyp oqýshylary arasynda "Uly dalanyń ulyq tulǵasy" taqyrybynda úzdik esse baıqaýyn jarııalaǵan bolatyn.
Baıqaýdyń maqsaty – óskeleń urpaq arasynda Ábý Nasyr ál-Farabıdiń murasyn tanytý, oqýshylardyń shyǵarmashylyq jáne áleýmettik-kommýnıkatıvti daǵdylaryn shyńdaý, óz Otanynyń tarıhyna, Uly dala eliniń ulyq tulǵalarynyń eńbegine degen eljandylyq sezimin qalyptastyrý.
Qabyldaý jumysynyń qorytyndysyna sáıkes, 100-den astam jumys qazaq, orys, aǵylshyn tilinde jazylyp, skanerlengen. Jeńimpazdardy konkýrs komıssııasynyń músheleri ashyq daýys berý arqyly anyqtady.
7-9 synyp:
I oryn – Amıreeva Ádemi, № 37 mektep-gımnazııa;
II oryn – Ábdikárim Aıym (№ 68 mektep-gımnazııa), Arapbaeva Nazıra (№ 53 mektep-lıseı);
III oryn – Azatqyzy Samǵat (№64 mektep-lıseı), Hamzına Arýjan (№ 73 mektep-lıseıi), Esenbekova Qyz Jibek (№ 50 mektep-lıseı), Tóleýtaeva Kalıma (№ 10 mektep-gımnazııa);
10-11 synyp:
I oryn – Altynbekova Ázel, № 50 mektep-lıseı;
II oryn – Qonysova Izmıra (№74 mektep-gımnazııa), Dınmýhammedova Gýlnýr (№ 50 mektep-lıseı); Saparbekova Dılnaz (№ 68 mektep-gımnazııa),
III oryn – Tumarbek Nurdana Marlanqyzy (№ 2 mektep-gımnazııa), Abdykarımova Ásel (№ 71 mektep-lıseı).
Sonymen qatar «Ǵylymı-izdenis sheberligi úshin», «Ushqyr oılylyǵy úshin» nomınasııalary boıynsha jeńimpazdar anyqtaldy. Árbir jumys óziniń avtorlyq oı erkindigimen, shyǵarmashylyǵymen erekshelenedi.
№74 mektep-gımnazııanyń oqýshysy Qonysova Izmıra «Elimniń erteńi jarqyn bolýy úshin búgingi jastardyń biri – men ne isteýim kerek? Árıne, Otanyma, týǵan elime, halqyma paıdasy tıer ispen aınalysqandy jón sanaımyn. Bolashaǵymnyń kilti bilimde ekenin anyq bilemin. Farabı babam «Adam óz maqsatyna ózin ózi jetildirý arqyly jetedi» degendeı, maqsatyma qol jetkizý únemi bilimimdi jınaqtap, tolyqtyryp otyrýym kerek,- dep oı tolǵasa, № 68 mektep-gımnazııanyń oqýshysy Saparbekova Dılnaz
Ázız ata, Ál-Farabı babamyz,
Bizge paryz – ulylyǵyń tanymaq
Tuńǵıyqtan, tuńǵıyqtan shyǵa aldyq
Qypshaqtardyń álemge atyn shyǵardyq.
Zamanynda tura alatyn qatar kim
Sen ekinshi Arıstotel atandyń, - degen óleń joldaryn arnaıdy.
№ 10 mektep-gımnazııanyń Tóleýtaeva Kalıma: Ál-Farabı eńbekteriniń rýhanı azyǵy jáne eńbekteriniń mazmuny búgingi táýelsiz, baqytty urpaqtyń sanasyna «bilim al, dana bol, rýhanı baı bol» dep ishteı sybyrlap, elimizdiń, jerimizdiń ulylarynyń ulysy bolýyna jáne jalpy rýhanı azyǵy mol, boıynda adamgershilik qasıetteri basym, kókiregi oıaý dana, ómirde óziniń ornyn taba alǵan, bolashaqtyń damýyna úles qosqan tulǵa bolýǵa shaqyratyndaı. Meniń oıymsha, balalardy Ál-Farabı tulǵasymen, onyń ishinde shyǵarmalary jáne naqyl sózderimen mektep kezinen paıymdap, tanystyrǵandy jón dep sanaımyn. Olarǵa rýhanı máni mol bilimniń qaınar kózi sanalatyn aqparat usynylsa, óse kele bolashaqta rýhanı saýatty, bilikti, eń birinshi jan-dúnıesi tárbıelengen ári taza, myqty, elimizdiń odan ári damýyna qyzmet etetin azamattar men azamatshalar ósetinine senemin! Sondyqtan ǵulama atamyzdyń muralaryn baǵalap, meńgerip rýhanı baılyǵy mol tulǵa bolyp jetilý bizdiń paryzymyz dep bilemin!
Adamzattyń jınaqtaǵan materıaldyq baılyǵy qandaı qymbat bolsa, uly tulǵalardyń eńbekteri men rýhanı baılaǵy sondaı qymbat. Bul mádenı muranyń qundylyǵyn bilip, onyń mańyzyn joǵaltpaý – bizdiń abyroıly mindetimiz. Ál-Farabı – rýhanı bulaq bastaýy, uly dalanyń ulyq tulǵasy, - dep qorytyndylaıdy № 53 mektep-lıseıdiń oqýshysy Arapbaeva Nazıra.
Jeńimpazdarǵa dıplom jáne estelik syılyqtar, qatysýshylarǵa sertıfıkattar usynylady.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.