Keshe Parlament Májilisiniń Tóraǵasy Oral Muhamedjanovtyń jetekshiligimen ótken palata bıýrosynyń otyrysynda depýtattyq korpýstyń zań shyǵarýshylyq qyzmetine qatysty máseleler qaraldy, dep habarlady Májilistiń baspasóz qyzmeti.
Aldaǵy aptada ótetin jalpy otyrysta depýtattardyń talqysyna keıbir zańnamalyq aktilerge munaı ónimderiniń aınalymy salasynda memlekettik baqylaýdy kúsheıtýge qatysty zań jobasyn birinshi oqylymda qaraý máselesi usynylatyn boldy. Sondaı-aq, birinshi oqylymda áýe keńistigin paıdalaný jáne avıasııa qyzmeti týraly, birqatar zańdarǵa kólik máseleleri boıynsha tolyqtyrýlar engizýdi kózdeıtin zań jobalaryn talqyǵa salý kózdelip otyr.
Májilistiń jalpy otyrysynyń kún tártibine palatanyń Halyqaralyq ister, qorǵanys jáne qaýipsizdik komıtetiniń usynýymen Keden odaǵynyń kedendik aýmaǵynda sáıkestikti mindetti baǵalaýǵa jatatyn ónimniń aınalymy týraly, sondaı-aq Shanhaı yntymaqtastyq uıymyna múshe memleketterdiń úkimetteri arasyndaǵy halyqaralyq aqparattyq qaýipsizdikti qamtamasyz etý salasyndaǵy yntymaqtastyq týraly kelisimderdi ratıfıkasııalaý týraly zań jobalary engiziletin boldy.
“Egemen-aqparat”.