«Bárimiz birdeımiz – kemsitýdi bilmeımiz»

Osyndaı atpen elordada tuńǵysh ret múmkindigi shekteýli jandardyń respýblıkalyq konkýrsy ótti

Múmkindigi shekteýli jandar arasynda ótken respýblıkalyq baıqaý túrli nomınasııalar boıynsha órbidi. Aımaqtyq irikteý kezeńderimen alǵanda tórt aıǵa jýyq ýaqytta kil myqtyny anyqtaǵan bul synnyń núktesi Astanada qoıyldy. Úsh kúnge sozylǵan dýmandy dodanyń jeńimpazdary elordadaǵy Táýelsizdik saraıynda ótken gala-konsertte marapattaldy. Atalmysh sharaǵa Eńbek jáne halyqty áleýmettik qorǵaý mınıstri Tamara Dúısenova kelip, baıqaýda baǵyn synaǵan barsha jurtqa degen alǵysyn jetkizdi.

Osyndaı atpen elordada tuńǵysh ret múmkindigi shekteýli jandardyń respýblıkalyq konkýrsy ótti

Múmkindigi shekteýli jandar arasynda ótken respýblıkalyq baıqaý túrli nomınasııalar boıynsha órbidi. Aımaqtyq irikteý kezeńderimen alǵanda tórt aıǵa jýyq ýaqytta kil myqtyny anyqtaǵan bul synnyń núktesi Astanada qoıyldy. Úsh kúnge sozylǵan dýmandy dodanyń jeńimpazdary elordadaǵy Táýelsizdik saraıynda ótken gala-konsertte marapattaldy. Atalmysh sharaǵa Eńbek jáne halyqty áleýmettik qorǵaý mınıstri Tamara Dúısenova kelip, baıqaýda baǵyn synaǵan barsha jurtqa degen alǵysyn jetkizdi.

Baıqaýda baryn salyp, qazy­lar alqasynyń oń baǵasyn alǵan jeńimpazdarǵa kelsek, olar – on nomınasııa boıynsha úzdik dep tanylǵandar. Jeńimpazdar túrli jastar aralyǵynda boldy. «Kásibiniń úzdigi» saıysynda Baqyt Balǵymbekova (Aqmola oblysy), Gúlmeıram Srajova (Aqtóbe oblysy) úzdik dep tanylsa, «Úzdik bı» nomınasııasynda Sandýǵash Aqanova men Erlan Nurmaǵambetov (Pavlodar oblysy), «Iýnost» bı toby (Qostanaı) jáne Janat Jalǵas (Aqtóbe oblysy) ózderine teń keler bıshi joq ekendikterin dáleldedi. Al «Aqyldylar» sy­nynda Dına Sádýaqasova (Pav­lodar oblysy), Damır Samar­hanov (Shyǵys Qazaqstan oblysy) ózderin erekshe qyrla­rynan tanytsa, Meıramgúl Ǵalıeva (Batys Qazaqstan oblysy) «Úzdik stýdent» atandy.

«Úzdik týyndy» foto konkýrsynda Álibek Tólegenov (Shyǵys Qazaqstan oblysy), Nazym Bekjúnisova (Almaty oblysy), Erlan Smetovtiń (Jambyl oblysy) baǵy jansa, «Altyn qalam» ıeleri bolyp, Oljas Baıdoldauly (Almaty oblysy), Qýanysh Aýǵanbaev (Jambyl oblysy), Nurmuhammed Ábilqasym (Qyzylorda oblysy) tanyldy.

«Eń úlgili otbasy» syny da jıylǵan jurtty qyzyqtyrmaı qoımady. Munda birinen biri ótken otbasylar óz sheberlikteri men úlgili qasıetterin kórsetip baqty. Nátıjesinde Pavlodar oblysynan kelgen Krasnosheko otbasynyń baǵy janyp, birinshi oryndy ıelendi.

«Úzdik áleýmettik joba» qorytyndysynda Áıgerim Dáýletbaeva (Jambyl oblysy) men Ásııa Ahtanova (Almaty qalasy) dara shyqsa, Nurhan Kóbeev (Atyraý oblysy), Ásel Quljanova (Pavlodar oblysy) jáne Marat Álıasqarov (Shyǵys Qazaqstan oblysy) «Úzdik oryndaýshylar» qatarynan kórindi. Olardyń konsertte shyrqaǵan ánderi tyńdarmanyn tamsandyrmaı qoımaıtyndaı edi.

Sporttaǵy jetistikterimen kózge túsken órender de bul konkýrstan syrt qalǵan joq. Saıysta baryn salǵan sańlaqtar ishinen Ǵabıt Esjanov (Jambyl oblysy) «Úzdik sportshy» nomınasııasynyń jeńimpazy atandy.

Múmkindigi shekteýli aza­mat­tarǵa arnalǵan atalmysh konkýrsta jeńimpaz atan­ǵan­dardyń barlyǵy da 350 myń teńge kóle­minde aqshalaı syılyq­tar­men mara­pattalsa, qalǵan júl­de­ger­ler de syılyqsyz qalmady.

«Bárimiz birdeımiz – kemsitý­di bilmeımiz» atty alǵashqy res­pýb­lıkalyq saıysy qoǵam nazaryn múgedek jandardyń máselelerine aýdarýǵa, sonymen birge, olarǵa degen qarym-qatynas pen qoǵamǵa degen túsinikti ózgertýge, múgedekterdi qoǵamnyń ózge de toptary sekildi barlyq múmkindikterin jan-jaqty tanyp, moıyndaýǵa baǵyttalǵan», – deıdi sharany uıymdastyrýshylar.

Respýblıkanyń ónerli degen ul-qyzyn jınap ótkizilgen alǵashqy konkýrs joǵary deń­geıde ótti. Endi osy ıgi bastama óz jalǵasyn taba berse eken deımiz...

Ábdirahman QYDYRBEK,

«Egemen Qazaqstan».