Memleket basshysy Qasym-Jomart Toqaev halyqqa Joldaýynda sybaılas jemqorlyqpen kúresý úshin qoǵamdyq keńesterdiń rólin arttyrý qajettigine toqtaldy, dep habarlaıdy Egemen.kz.
«Sybaılas jemqorlyqpen kúres barynsha júıeli sıpat alýda. Jemqorlyqtyń paıda bolý sebepterine kóbirek nazar aýdarylyp, aldyn alý jumystary júrgizilýde. Endi, jemqorlyqqa aparatyn faktorlardy anyqtaý úshin memlekettik organdar men kvazımemlekettik sektordyń normatıvtik aktilermen jumys úderisine jemqorlyqqa qarsy kúres turǵysynan arnaıy taldaý júrgizgen jón.
Sonymen qatar sybaılas jemqorlyqpen kúres jaýapqa tartýdan qoryqqan sheneýnikterdi derbestik, bastamashyldyq jáne jedel áreket etý qaterinen aıyrmaýǵa tıis. Biz memlekettik baqylaýǵa balama retinde qoǵamdyq baqylaý ınstıtýtyn qoldaı otyryp, tıisti quqyqtyq negiz qalyptastyrýymyz kerek», dedi Prezıdent.
Osyǵan baılanysty memlekettik organdardyń, kvazı memlekettik sektordyń qoǵam aldyndaǵy ashyqtyǵyn jáne eseptiligin qamtamasyz etýge jol ashatyn qoǵamdyq baqylaý týraly zańdy ázirlep, qabyldaýdy tapsyrdy.
«Qoǵamdyq keńesterdiń rólin arttyra túsý kerek. Olardy satyp alýdy uıymdastyratyn komıssııalardyń jumysyna tartý qajet. Sondaı-aq kvazı memlekettik sektorda qoǵamdyq keńes qurý múmkindigin qarastyrý kerek. Parlament qaralymyndaǵy tıisti zań jobasyn jyl aıaǵyna deıin qabyldaǵan jón. Sonymen qatar qoǵamdyq keńesterdiń quramyna túrli áleýmettik top ókilderin keńinen tartý kerek. Mysaly, biz múmkin shekteýli adamdar osyndaı uıymdardyń jumysyna aralasyp, óz únderin jetkizý úshin qolaıly jaǵdaı jasaýymyz qajet. Olar árqashan memlekettiń erekshe nazarynda bolýǵa tıis», dedi Q.Toqaev.