2026 jylǵy 2 naýryzda Astanadaǵy Nurorda lıseıinde «Ana tili» respýblıkalyq zııatkerlik olımpıadasynyń jeńimpazdary marapattaldy. Bıyl olımpıada ekinshi ret Ǵylym jáne joǵary bilim mınıstrliginiń qoldaýymen, Halyqaralyq «Qazaq tili» qoǵamynyń bastamasymen jáne «Bilim-Innovasııa» halyqaralyq qoǵamdyq qorynyń uıymdastyrýymen ótti, dep habarlaıdy Egemen.kz.
Saltanatty sharaǵa memleket jáne qoǵam qaıratkerleri, depýtattar, til janashyrlary, sondaı-aq qazaq tilin qoldap júrgen kásipkerler qatysty.
Irikteý kezeńine elimizdiń barlyq óńirinen 9-11-synyptyń 2000-nan astam oqýshysy qatysty. Úzdik nátıje kórsetken 64 komanda (192 oqýshy) respýblıkalyq kezeńge joldama aldy. Fınalda qatysýshylar «Pikirsaıys», «Tilshiler» jáne «Bilimpazdar» baǵyttary boıynsha baq synady.
Olımpıadanyń bas júldesin Túrkistan oblysynan kelgen «Úsharys» komandasy ıelendi. Sondaı-aq 11-synyptyń 14 oqýshysyna elimizdiń jetekshi joǵary oqý oryndarynyń bilim granttary tabystaldy. Atap aıtqanda, Abaı atyndaǵy Qazaq ulttyq pedagogıkalyq ýnıversıteti – 5 grant, Qazaq ulttyq qyzdar pedagogıkalyq ýnıversıteti – 5 grant, SDU ýnıversıteti – 2 grant, Narxoz ýnıversıteti – 1 grant jáne Coventry University Kazakhstan – 1 grant bóldi.
Budan bólek, komandalar «Úzdikter», «Ozattar», «Myqtylar» jáne «Belsendiler» atalymdary boıynsha marapattaldy.
Qazylar alqasynyń quramyna fılolog-ǵalymdar, «Bilim-Innovasııa» lıseıleriniń mamandary, tájirıbeli ádiskerler men belgili qalamgerler kirdi.
«Ana tili» olımpıadasynyń basty maqsaty – qazaq tilin jastar arasynda keńinen nasıhattaý, ony ǵylym men bilimniń tili retinde damytý, sondaı-aq oqýshylardyń oqý saýattylyǵy men jazý mádenıetin arttyrý. Osy baǵytta Halyqaralyq «Qazaq tili» qoǵamy muǵalimderge ádistemelik qoldaý kórsetip, til janashyrlaryn biriktiretin kásibı alańdar uıymdastyryp keledi.
«Bizdiń basty maqsatymyz – sózge, ádebıetke, tilge qyzyǵýshylyǵy bar daryndy oqýshylardyń jolyn ashyp, olarǵa jańa múmkindikter usyný. Sonymen qatar oqýshylar arasynda qazaq tili pániniń tartymdylyǵyn arttyryp, onyń zııatkerlik áleýetin kórsetýge mán berdik. Bul olımpıada jastardyń qazaq tiline qyzyǵýshylyǵyn arttyratynyna senimdimiz», deıdi Halyqaralyq «Qazaq tili» qoǵamynyń prezıdenti Raýan Kenjehanuly.
Joba qazaq tilin tereń meńgerýge yntalandyryp, ony jastar arasynda bedeldi zııatkerlik qundylyq retinde ornyqtyrýdy kózdeıdi. Uıymdastyrýshylardyń aıtýynsha, olımpıada aldaǵy jyldary dástúrli túrde jalǵasady.
Sharanyń bas demeýshisi – Freedom Holding Corp. – qarjylyq qyzmet kórsetetin, brokerlik qyzmetpen, baǵaly qaǵazdarmen saýda jasaýmen, ınvestısııalyq zertteýlermen jáne konsýltasııa berýmen, ınvestısııalyq banktik jáne anderraıtıngtik kórsetiletin qyzmettermen, ıpotekamen, saqtandyrýmen, telekommýnıkasııamen, áýe bıletteri men mádenı jáne sporttyq is-sharalarǵa bıletterdi onlaın satýmen aınalysatyn, onlaın sýpermarket qyzmetterin jáne t.b. usynatyn ártaraptandyrylǵan kompanııa bolyp sanalady.