Áskerge shaqyrý kezinde sanıtarlyq-gıgıenalyq talaptarǵa erekshe nazar aýdarylýda. Bul týraly ákimdiktiń baspasóz qyzmetine silteme jasap Egemen.kz habarlaıdy.
Búgin Nur-Sultan qalasynyń jıyn pýnktinde kúzgi áskerge shaqyrý naýqany bastaldy.
Osy kúzde Nur-Sultan qalasynyń 800-den astam shaqyrý jasyndaǵy azamattary Qarýly Kúshterdiń, Ulttyq qaýipsizdik komıtetiniń Shekara qyzmeti jáne Ulttyq ulan áskerı bólimderi qataryna Otan aldyndaǵy boryshyn óteýge attanady.
"Kúzgi áskerge shaqyrý naýqany qyrkúıek aıynan bastap jeltoqsan aıynyń aıaǵyna deıin júrgiziledi. Jas sarbazdardyń alǵashqy legin kelesi aptadan bastap áskerı bólimderge jiberemiz. Qarýly kúshterimiz ozyq tehnologııa jáne zamanaýı tehnıkamen keńinen jabdyqtalýda. Sol sebepti ásker qataryn jas sarbazdarmen tolyqtyrýdy sapaly júrgizýge asa kóńil bólýdemiz", – dedi Nur-Sultan qalasy qorǵanys isteri jónindegi departamentinyń shtab bastyǵy, polkovnık Aıdyn Saǵynbekov.
Onyń aıtýynsha, áskerge shaqyrý kezinde sanıtarlyq-gıgıenalyq talaptarǵa erekshe nazar aýdarylýda.
"Shaqyrylýshylardyń dárigerlik komıssııa ótýi jáne áskerı komandalardy jasaqtaý kezinde pandemııanyń aldyn alý sharalarynyń barlyǵy qatań qoldanylyp, áleýmettik qashyqtyq saqtalatyn bolady. Saqtaný sharalary kóktemgi áskerge shaqyrý naýqany kezinde de iske asyrylǵan, tájirıbemiz bar", – dedi Aıdyn Saǵynbekov.
Áskerge shaqyrý dárigerlik komıssııasynyń saraptamasynan 18 ben 27 jas aralyǵyndaǵy jalpy sany 9 myń er azamatty ótkizý josparlanyp otyr.