Qazaqstannyń basty ulttyq áýe tasymaldaýshysy – «Eır Astana» kompanııasy Astana men Londonnyń Hıtroý áýejaıy arasynda jańa reıs ornatyp, onyń aptalyq mólsherin úsheýge deıin ulǵaıtty. Keshe elorda áýejaıynda osyǵan arnalǵan jıyn bolyp ótti. Reıs tusaýkeserine Ishki ister mınıstrliginiń, Kólik jáne kommýnıkasııa mınıstrliginiń, Ulybrıtanııa elshiliginiń, «Samuryq-Qazyna» ulttyq ál-aýqat qorynyń, «Eır Astana» áýe kompanııasy men buqaralyq aqparat quraldarynyń ókilderi qatysty.
Tusaýkeser saltanaty ótip bolǵan boıda áýe kompanııasynyń jetekshileri bastaǵan alǵashqy reıstiń jolaýshylarynyń biri retinde biz de bir top jýrnalıspen birge alystaǵy Albıon jerine qaraı attandyq.
Qazaqstannyń basty ulttyq áýe tasymaldaýshysy – «Eır Astana» kompanııasy Astana men Londonnyń Hıtroý áýejaıy arasynda jańa reıs ornatyp, onyń aptalyq mólsherin úsheýge deıin ulǵaıtty. Keshe elorda áýejaıynda osyǵan arnalǵan jıyn bolyp ótti. Reıs tusaýkeserine Ishki ister mınıstrliginiń, Kólik jáne kommýnıkasııa mınıstrliginiń, Ulybrıtanııa elshiliginiń, «Samuryq-Qazyna» ulttyq ál-aýqat qorynyń, «Eır Astana» áýe kompanııasy men buqaralyq aqparat quraldarynyń ókilderi qatysty.
Tusaýkeser saltanaty ótip bolǵan boıda áýe kompanııasynyń jetekshileri bastaǵan alǵashqy reıstiń jolaýshylarynyń biri retinde biz de bir top jýrnalıspen birge alystaǵy Albıon jerine qaraı attandyq.
Maqsatymyz – aspan astynan saıahat syzatyn alty saǵattan astam áýe jolyn bastan ótkerip, alǵashqy marshrýt jónindegi áserimizdi qalyń jurtqa jetkizý.
Shynynda da osy aıtylǵan ýaqyttyń shyrǵasynda kóńilge túıgen oılarymyz da, alǵan ádemi áserimiz de kóp boldy. Olardyń bárin endi tórt kúnnen soń, ıaǵnı elge aman-esen jetip alǵannan keıin asyqpaı otyryp qaǵazǵa túsirmek nıettemiz. Ázirge aıtarymyz, jyldan jyl asqan saıyn qanatyn keńge jaıyp, áleýeti artyp kele jatqan elimiz turǵyndarynyń ózge elderdiń jurtymen aralastyǵy da aıtarlyqtaı arta túsken eken. «Barmasa, kelmese jat bolatynyn» biletin bizdiń aǵaıyndar qazir jaǵdaılary kelip turǵan soń shet elderge jıi atbasyn buryp, sapar sanyn kóbeıtipti. Myna ashylyp jatqan qosymsha reıs te sol qajettilikten týyndap otyrsa kerek.
Qosymsha demekshi, kompanııadaǵylardyń túsindirýine qaraǵanda, bul reıs burynnan bar Almaty – London jáne Astana – Frankfýrt baǵyttaryn tolyqtyratyn bolady. Dálirek aıtqanda, Londonǵa bet túzeıtin jańa qatynas árbir sársenbi saıyn áýe kemesin Almaty – London – Astana – Almaty, árbir beısenbi saıyn Almaty – Astana – London – Almaty, al senbi saıyn Almaty – London –Almaty baǵyttaryna ushyryp turady.
Sózdiń oraıynda jańa reıs qyzmetin ekonom-klass boıynsha eki jaqqa paıdalanýshynyń barlyq alymdaryn qosyp eseptegende, 110 870 teńgeden, al bıznes-klass úshin 522 999 teńgeden tóleıtinin aıta keteıik. Sol sııaqty Astana–London baǵytynda ushý 6 saǵat 50 mınýt ýaqytty alsa, London–Astana ara qashyqtyǵynyń ýaqyttyq mólsheri 6 saǵat 20 mınýtpen ólshenetinin de osynda kelgeli beri estip jatyrmyz.
Birqatar maǵlumattardy biz «Eır Astana» kompanııasy AQ prezıdenti Pıter Fosterden aldyq. «Biz Ulybrıtanııaǵa reıster sanyn arttyra alǵanymyzǵa qýanyp otyrmyz, – dedi ol. – Osy arqyly biz Astana men London arasyndaǵy jolaýshylar tasqynyn ulǵaıtyp qana qoımaı, sonymen birge, alǵash ret eki el ortalyǵyn tikeleı baılanystyrýǵa qol jetkizdik. Ulybrıtanııa Premer-mınıstri Devıd Kemeron Qazaqstanǵa jasaǵan saparynan soń birden qabyldaǵan osy sheshim eki el arasyndaǵy qarym-qatynastyń kúsheıip kele jatqanyn baıqatady. Bul bir jaǵy Astanada 2017 jyly ótetin EKSPO kórmesine degen yntanyń artyp kele jatqanyn bildiredi».
Osylaısha áni-mine degenshe kógildir sýlar qorshap jatqan jasyl jelekti Brıtanııa jerine de kelip qalyppyz. Aıtqandaı, Londonnyń aspany ádettegideı bulyńǵyrlaý eken. Qansha degenmen, teristik degen aty bar ǵoı, aýa raıy da bizge qaraǵanda salqyndaý sııaqty. Biraq bir ushaq qonyp, bir ushaq ushyp jatqan Hıtroýdyń yǵy-jyǵy áýejaıy naǵyz qaınaǵan qyzý tirshiliktiń ortasynda turǵan sekildi. Tús aýa ǵana Astana aıasynda turǵan bizge endi Albıon jeri qushaq jaıdy.
Janbolat AÝPBAEV,
«Egemen Qazaqstan» –Londonnan.