Tamyz aıynyń sońǵy onkúndiginde Syr kúrishine oraq tústi. Qazir aımaqtaǵy basty ónimniń 14 929 gektary orylyp, jartysynan astamy bastyryldy. Ortasha ónim gektaryna 47,7 sentnerden aınalýda. Mamandar boljamyna sáıkes, bıyl jınalatyn ónim byltyrǵy kólemnen kem bolmaıdy.
Jalpy, osy jyly oblys boıynsha 184,2 myń gektarǵa aýyl sharýashylyǵy daqyldary egilgen. Negizgi daqyl – kúrishtiń kólemi 89,5 myń gektar. El nesibesin eselegen dıqandar osy jazda darııa deńgeıi tómen túsken tusta alańdap qalǵan bolatyn. «Qazsýshar» oblystyq fılıalynyń mamandary sharýashylyqtarǵa sýdy kezekpen berýdiń kestesin jasap, bul tyǵyryqtan da shyǵýdyń joly tabyldy. Biraq zardaby jyldaǵydan qatty sezilgen bıylǵy sý tapshylyǵy óńirde egisti ártaraptandyrýǵa asa mán berý qajettigin kórsetip ketti.
Osy baǵytta oblysta alǵash ret qant qumaıy – 70, soıa – 240, júgeri 1 667 gektarǵa deıin jetkizilip, ylǵal saqtaǵysh akvagelderdi paıdalaný arqyly 80 gektarǵa kúzdik bıdaı egildi.
Jalpy bıyl 59,8 myń tonna mıneraldyq tyńaıtqyshtar, 74,6 myń lıtr gerbısıd satyp alynyp, kúrish egistiginiń 65,6 myń gektary aramshópke qarsy óńdeldi, 67,5 myń gektar alqap tyńaıtqyshtarmen ústep qorektendirildi. Qazir kúrishten basqa erte egiletin dándi daqyldar tolyǵymen jınalyp bitti.
Egin naýqanynda 1640 traktor, 843 kombaın, 458 jatka, 308 júk kóligi júr. Jalpy, egin jınaý men kúzgi dala jumystary úshin 12,5 myń tonna arzandatylǵan dızel otyny bólingen.
Qyzylorda oblysy