SQO oblystyq PD baspasóz qyzmetinen kelgen myna habarǵa tań qalmasqa lajyń joq. Onda Esil aýdanynyń bir turǵyny aýdandyq aýrýhanaǵa kelip, dárigerlerdi uryp, odan «jedel járdem» kóligin aıdap áketpek bolǵany týraly aıtylady, dep habarlaıdy Egemen.kz.
37 jasar adam masań kúıde bolǵan. Biraq nege naqty aýrýhanaǵa shabýyl jasaǵany jáne dárigerlerdi nege urǵany týraly aıtylmaǵan. Bul jerde tek bul adamǵa medısına qyzmetkerleriniń zardaby ótkenin boljaýǵa bolady. Ashynbaǵan adam bolsa aýrýhanaǵa shabýyl jasaýy múmkin emes qoı.
Polısııanyń habaryna qaraǵanda ol sol aýrýhananyń bir «jedel járdem» kóligin shopyrynan tartyp alyp, minip ketken. Sosyn basqa jerde turǵan «VAZ 2121» qyzmettik avtokóligine soǵylyp, toqtaǵan. Sońynan kelgen júrgizýshini de soqqyǵa jyqqan. Shaqyrtý boıynsha jetken ýchaskelik polısııa ınspektory ǵana ony kúshpen ustaǵan.
Esil aýdany PB bastyǵy, podpolkovnık Erlik Eslámbekov atalǵan fakti boıynsha sotqa deıingi tergep-tekserýdiń sharalary bastalǵanyn málim etti. «Quqyq buzýshy Qylmystyq kodekstiń «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» týraly aıtylǵan 200-shi baby boıynsha aıyptalýda. Sonymen qatar oǵan Ákimshilik quqyq buzýshylyq týraly kodekstiń «Júrgizýshiniń kólik quralyn alkogoldik, esirtkilik jáne (nemese) ýytqumarlyq masań kúıde basqarýy, sol sııaqty kólik quralyn alkogoldik, esirtkilik jáne (nemese) ýytqumarlyq masań kúıdegi adamnyń basqarýyna berý» baby boıynsha hattama toltyryldy. Sotqa deıingi tergeý buzýshy 20 táýlik ákimshilik qamaý jazasyn ótegennen keıin jalǵasatyn bolady. Júrgizýshini soqqyǵa jyǵý faktisi boıynsha prosessýaldyq sheshim sot-medısınalyq saraptamasynan keıin qabyldanatyn bolady», dedi ol.
Alaıda adamnyń aýrýhanaǵa nege shabýyl jasaǵanyn anyqtaý boıynsha eshnárse aıtylmaıdy. Polısııa kózine túsken buzýshylyqty ǵana emes, onyń sebepterin de anyqtasa quba qup bolar edi. Adamdy ashyndyryp, aıamas halge jetkizýdiń ózi de qylmys emes pe? Memlekettik organdar barlyq iske ádilettikpen qaraýy kerektigin jýyrda óziniń Joldaýynda Prezıdent te talap etti. Sondyqtan bul azamattyń is-áreketine sot keńirek turǵydan qarap, ádiletti sheshim qabyldar degen úmittemiz.