Osydan bir aı buryn Soltústik Qazaqstan oblystyq polısııasynyń Ekstremızmge qarsy is-qımyl basqarmasynyń qyzmetkerleri ekstremıstik materıaldardy saqtaǵany jáne taratqany úshin destrýktıvti dinı aǵym ustanýshysyn ustap, jaýapqa tartqan edi, dep habarlaıdy Egemen.kz.
Polısııa qyzmetkerleri "VKontakte" áleýmettik jelisine monıtorıng júrgizý barysynda destrýktıvti aǵym ókiliniń dinı mazmundaǵy aýdıofaıldar men fotomaterıaldardy taratý faktisin anyqtaǵan. Jedel-izdestirý is-sharalaryn júrgizý barysynda jazbalardyń avtory anyqtaldy. Ol buryn sottalmaǵan Petropavldyń 33 jastaǵy turǵyny bolyp shyqty.
Destrýktıvti dinı aǵymdardyń jeteginde ketken bul áıel óziniń búlingenimen qoımaı jeke paraqshasynda basqalardy da tartyp, jat aǵymnyń aýdıo jáne foto qujattaryn dáriptep, ornalastyrǵan. Qalyptaspaǵan jas sanalar mundaılardy kórip, aısyz qarańǵy túnde júrgendeı adasatyny haq. Tipti týǵan ata-anasyn da jat sanap ketetinder bar. Sondyqtan onyń búlinshilik qasireti orasan. "Daıyn aýdıo men fotolardy ǵana paraqshama saldym" dep jeńil qutylǵysy keletin syltaý mundaı qylmysqa júrmeıdi. Qasıetti dinimizdi buzyp, oǵan túrli destrýktıvti aǵymdardy aralastyrýshylarǵa qoǵam múlde qarsy ekeni haq.
Atalǵan fakti boıynsha Ákimshilik quqyq buzýshylyq týraly kodekstiń «Buqaralyq aqparat quraldarynyń ónimin, sol sııaqty ózge de ónimdi Qazaqstan Respýblıkasynyń aýmaǵynda daıyndaý, saqtaý, ákelý, tasymaldaý jáne taratýdy qarastyratyn 453-babtyń 2-bóligi boıynsha qazir materıaldar jınastyrylǵan. Tirkelgen kontent Aqparat jáne qoǵamdyq damý mınıstrliginiń Din isteri jónindegi komıtetiniń dintaný saraptamasyna da jiberilgen edi. Sarapshylar ony "materıaldar ekstremıstik bolyp tabylady jáne olardy el aýmaǵynda taratý men saqtaýǵa tyıym salynǵan", degen qorytyndy shyǵardy.
Qyrkúıek aıynyń segizinshi juldyzynda Petropavl qalasynyń Mamandandyrylǵan ákimshilik soty buzýshyny qylmysker dep taýyp, ÁQBtK 453-baby 2-bóligi boıynsha aıyptap, oǵan 20 aılyq eseptik kórsetkish kóleminde aıyppul saldy.
"SQO PD EQIQB qyzmetkerleri din zańnamasy salasynda quqyq buzýshylyqtardy anyqtaý boıynsha turaqty negizde jumys júrgizedi. Turǵyndardyń destrýktıvti dinı aǵymdardy ustanýshylar qataryna qosylyp ketýin boldyrmaý úshin aldyn alý jumystary jasalady. Qazir ekstremıstik aǵymǵa jańa ustanýshylardy tartý negizinen messendjerler men áleýmettik jeliler arqyly júzege asyrylady. Aǵymǵa tartýshy adam saqtyqpen áreket etedi. Deı turǵanymen, jyl basynan beri SQO aýmaǵynda din salasynda 13 quqyq buzýshylyq anyqtaldy. 8 quqyq buzýshy ákimshilik jaýapkershilikke tartyldy, qalǵandaryna dintaný saraptamalary taǵaıyndaldy", - dedi SQO Polısııa departamenti bastyǵynyń orynbasary, polısııa polkovnıgi Rýslan Nazarov.