Túrkistanda ylǵı yńyldap, ándetip júretin jan bar. Jaqsy án týsa eken degen izdenisten týyndaǵan yńylǵa beıtanys jandar túsinbeı tańdana qarar. Biraq... yńyldap júretin aǵamyz áldebireýler sııaqty aldyn ala josparlap, tapsyrmamen án jazǵan emes. Án josparsyz, júrek ámirimen týýy tıis dep esepteıdi. Sodan da bolar, ol shyǵarǵan án az. El aıtpaǵan án – án emes deıdi. «Qansha ánińiz bar?» degen suraqqa el ishinde aıtylyp júrgen ánderin ǵana esepke alyp, jaýap beredi.
Iá, biz búginde bolashaq jýrnalısterge tálim-tárbıe berip júrgen ulaǵatty ustaz, túrkistandyq sazger Bekjigit Serdáli týraly áńgimelep otyrmyz. Ustazdyǵy jóninde uzaq áńgimeleýge laıyqty, ustanymynan aınymaıtyn, kózqarasyn ashyq bildirip, pikirin qaımyqpaı aıtatyn azamattyń júrekten shyqqan ánderin de el joǵary baǵalaıdy. Solardyń biri de biregeıi «Jas jubaılar» ániniń shyǵý tarıhy da qyzyq.
– Stýdenttik shaq. Kýrstas dos Qultóleý úılenip, búkil top muǵalimderdiń kózine túspeı, «Jezqazǵan, qaıdasyń?!» dep tartyp kettik. Júrdek poıyz. Vagon toly stýdentpiz. Ústel ústinde dastarqan etip jaıǵan «Lenınshil jastyń» (qazirgi «Jas Alash») qıyndysy jatyr. Qıyndyda – jarasymdy eki jupty beınelegen fotoetıýd. Oǵan jazylǵan eki shýmaq óleń. Avtory kórsetilmegen. «Sýretti túsirgen R.Hanalıev» dep qana tur. Gazet betindegi sýrette beınelengen bozbala men boıjetkenniń sezimderin dál kórsetip, dóp basqan jyr joldary maǵan qatty unady. Kýrstas qurbylardyń biri «Toıǵa apara jatqan syılyǵymyz qaıda?» dep qalmasy bar ma? Sońǵy tıynyna deıin bıletke jumsaǵan stýdentte qaıbir syılyq bolsyn. Oılanyp qaldyq. Manaǵy óleń eske tústi. Ońashada áýen týdy. Álgi eki shýmaqty salyp aıtyp kórip edim, áp-ádemi án dúnıege kelgendeı boldy. Toıǵa asyǵyp, kóńilderi alaburtyp kele jatqan kýrstastarǵa tyńdatyp kórip edim, bárine unaı ketti. Jezqazǵanǵa barǵansha qosyla shyrqap, jattap ta aldyq. «Senderge árdaıym oryn bar, Aq otaý tórine qonyńdar»...
«Jas jubaılar» atty jańa ándi sálden keıin búkil vagon, al Jezqazǵandaǵy toıdan soń búkil aýyl aıtyp ketti. Keıin ol stýdent jastardyń aýzynan tastamaıtyn súıikti ánine aınaldy. Tyńdaýshynyń da tyńdaýshysy bar ǵoı. «Oı, baýyrym, ániń án-aq eken, biraq sózin kim jazǵan?» dep qadala surap qoımaıtyndar da tabyldy. Rasynda da, ádemi ánge sebepker bolǵan qos shýmaq kimdiki eken? О́leń avtoryn «Lenınshil jastyń» redaksııasynan surap edik, eshkim bilmedi. Birde QazMÝ qalashyǵyndaǵy besinshi jataqhanaǵa «Lenınshil jastyń» jigitteri kezdesýge shaqyrylady. Bolashaq jýrnalıster men osy shaq jýrnalısteri bir-birine túrli suraqtar qoıyp, suhbattasyp, syrlasty. Kesh sońynda jýrfaktyń stýdentteri qonaqtarǵa arnap án aıtady. Sol baıaǵy «Jas jubaılar». Án aıaqtala bergende «Lenınshil jastyń» sol kezdegi ádebıet bóliminiń meńgerýshisi, kezinde Prezıdent Ákimshiliginde jaýapty qyzmetter atqarǵan aqyn О́tegen Oralbaev ornynan atyp turyp: «Bul men ǵoı! Meniń óleńim ǵoı!» dep aıǵaı saldy. Tamasha ánniń qos avtory arada eki jyl ótkende osylaı tabysqan edik, – dep eske alady sol bir kúnderdi Bekjigit Serdáli.
Onyń kóp ánderi jol ústinde poıyzda, ne avtobýsta týǵan. Aldymen áýendi yńyldap dombyraǵa ne magnıtofonǵa túsiredi. Avtobýs ishinde kókeıge kelip, úıde magnıtofonǵa jazylǵan áýenniń biri «Nege, nege?» áni. Búginde jýrnalıstik ne fılologııalyq salada ǵana emes, jaratylystaný ǵylymy men mádenıet salasynda da aıanbaı ter tógip kele jatqan professor, kompozıtor, Túrkistan jáne Kentaý qalalarynyń qurmetti azamaty, 100-den astam ǵylymı maqalanyń, 20-dan astam oqý quraldarynyń avtory Bekjigit Serdáliniń jýyrda «Nege, nege?» ánine Qyrǵyzstan, О́zbekstan, Armenııa jáne Qazaqstannyń jas ánshileriniń qatysýymen túsirilgen beınebaıannyń tusaýy kesildi.