О́tken aptada Mańǵystaý oblysynda taǵy bir ıtbalyqtyń óleksesi tabyldy. Sońǵy kezderi óńirde ıtbalyqqa qatysty másele jıilep ketti. Birinde ıtbalyq adamdardy tistese, ekinshisinde turǵyndar olarǵa kúsh kórsetedi. Birneshe jyl buryn ıtbalyqtardyń jappaı qyrylýy oryn alyp, áleýmettik jelini shýlatqany este.
El arasyndaǵy tentekterdiń ospadar áreketi búginde Mańǵystaýda ıtbalyqtardy sileıte sabap, teńkıte óltirip jatqandaı kózqaras qalyptastyrǵany ókinishti. Alaıda Kaspıı teńiziniń jaǵalaýyndaǵy turǵyndar únemi ıtbalyqtarmen teketireske túsip, joq jerden «jaý» taýyp alyp, aıqasyp júr degen oı týmaýy kerek. Teli-tentek qaıda da bar, ıtbalyqtar men adamdar arasynda oryn alǵan jaǵdaı – búkil Mańǵystaý turǵyndarynyń kelbeti bola almaıdy jáne barlyq adam ıtbalyq sabaýǵa yntaly emes. Itbalyqtyń oqys ólimi tirkelse, qys aılarynda teńizge keletin aqqýlardy qýana qarsy alyp, jaǵalaýǵa baryp jem shashyp, olarmen sýretke túsip máz-meıram bolatyn, dalada qalǵan syńar aqqýlardy izdep taýyp arnaıy kólikpen Aqtaýǵa aldyryp qamqorlyq tanytatyn, arystandy da qolǵa úıretip Almaty zoobaǵyna syılaǵan turǵyndardy «janýarlarǵa jany ashymaıtyn qatygez» syndy kústánalaýdyń qajeti joq.
«О́zekti janǵa – bir ólim» demekshi, ıtbalyqtyń ólimine múmkin, kárilik, múmkin teńizdegi áldebir jaısyzdyq, densaýlyǵynyń aqaýy sebep bolýy múmkin ǵoı...
Itbalyq sabaýǵa qatysty áńgime sońy saıabyrsı bergende teńiz jaǵalaýynan óli ıtbalyqtyń tabylýy taǵy bir áńgimeniń shetin kóterip ala jóneldi. «Kazakh Tourizm» UK» AQ basqarma tóraǵasy Erjan Erkinbaev Kaspıı teńiziniń jaǵalaýyn aralaý barysynda «Meniń aldymda jatqan denede eki jaraqat bar, onyń óltirilgenin kórýge bolady. Ne úshin? Bul janýar múgedek sııaqty qozǵalady, nege oǵan qol tıgizedi? Kóbisi aqymaqtar, odan da naızamen qabanǵa, qasqyrǵa baryńyz... Aqymaqsyzdar, sizder!» degen ashýly jazbany áleýmettik jelige jarııalady.
Máselege oraı suraý salǵanymyzda «Mańǵystaý oblysy Qaraqııa aýdanynyń teńiz jaǵalaýynda ólgen ıtbalyq týraly aqparat áleýmettik jelilerde keńinen tarap, keıbir buqaralyq aqparat quraldary bul aqparatty kóshirip jarysa jazǵan. Belgili bolǵandaı, elordalyq Erjan Erkinbaev Mańǵystaýǵa kelip ólgen ıtbalyq týraly feısbýk áleýmettik jelisinde post jarııalaǵan. Atalǵan derek boıynsha Mańǵystaý oblystyq orman sharýashylyǵy jáne janýarlar dúnıesi aýmaqtyq ınspeksııasynyń mamandary oqıǵa ornyna baryp, ıtbalyqtyń ádeıi óltirilmegenin anyqtaǵan. О́lgen ıtbalyqty qustar shoqyp tastaǵan. Aldyn ala boljam boıynsha, sý janýaryn tolqynmen teńiz jaǵaǵa laqtyrǵan. Itbalyqtyń naqty neden ólgenin bilý maqsatynda terisin alýǵa áreket jasaǵanymen nátıje bolmady. Sebebi teri ábden irip ketken» dep habarlady ınspeksııa mamandary.
Kaspıı teńizindegi ıtbalyqtardyń ólimi bolmaı turmaıtyn qubylys – jappaı qyrylý oryn alǵan sátter de bolǵan. Sany jyldan-jylǵa azaıyp bara jatqan janýardyń toptyq emes, jekelegen óliminiń ózi jan aýyrtady, áıtse de turǵyndardy tildeýdiń reti shamaly. Teńiz jaǵalaýyndaǵy jurt ıtbalyqpen óshtesse, tuqymyn tuzdaı qurtqan bolar edi. Búginge deıin az da bolsa tuqymynyń jetip júrgeni – Kaspıı teńizine ákelip kefal balyǵyn jersindirgen jergilikti jurttyń janashyrlyǵynyń arqasy.
Mańǵystaý oblysy