Bıyl Eńbek jáne halyqty áleýmettik qorǵaý mınıstrligi júrgizetin «Eńbek» memlekettik baǵdarlamasy aıasynda elimizdiń jumys kúshi kóp óńirlerinen jumys kúshi tapshy óńirlerge 4,3 myńnan astam adam qonys aýdarǵan. Onyń ishinde eńbekke jaramdy jastaǵy 2 303 adam bar 1 273 otbasy kóship kelgen.
Otbasy músheleriniń ishinen 1 652 adam jańa turǵylyqty jeri boıynsha jumysqa ornalastyrylǵan. Nátıjeli jumyspen qamtýdy jáne jappaı kásipkerlikti damytýdyń «Eńbek» memlekettik baǵdarlamasynda eńbek resýrstarynyń utqyrlyǵyn yntalandyrý úshin Úkimet aıqyndaıtyn óńirlerge erikti túrde qonys aýdaratyn adamdarǵa memlekettik qoldaý sharalary kózdelgen.
Sonyń ishinde Soltústik Qazaqstan oblysyna jyldyń aıaǵyna deıin barlyǵy 2,4 myń adamdy qamtyǵan 700 otbasy kóship kelmekshi. Atalǵan baǵdarlama aıasynda olarǵa arnap bıyl 788 baspana turǵyzylady. Kóship kelýshilerge kóshken jurttyń eski úıleri satylyp alynǵan joq, kileń jańa úıler turǵyzyldy. Bul úılerdiń kommýnaldyq qyzmet sapasy da jaı úılerge qaraǵanda artyq. Olarǵa jaryq qana emes, bárine sý tartylady. Al sý kelgen úıde basqa da qajetti sanıtarlyq qajettilikter de ornatylatyny sózsiz. Kóship kelýshilerdiń arasyndaǵy dáriger, muǵalim, mehanızator sııaqty mamandyq ıelerine granttar berilip, jumyspen de qamtamasyz etilýde.
Sonymen qatar memlekettik baǵdarlama aıasynda erikti qonys aýdarýǵa qatysýshylar úshin sýbsıdııa túrinde memlekettik qoldaý sharalary usynylady, atap aıtqanda otbasynyń árbir múshesine 35 AEK-ten bir jolǵy tólem (92 myń teńge) berildi. Bul kóship kelý shyǵyndaryn tolyq jabady. Bir jyl boıy aı saıyn 15-ten 30 AEK-ke deıin (39 myńnan 79 myń teńgege deıin) turǵyn úıdi jaldaý (jalǵa alý) jáne kommýnaldyq qyzmetterdi tóleý boıynsha shyǵyndardy óteý úshin otbasy músheleriniń sanyna jáne jergilikti jerge baılanysty tólenedi. Bul jerdegi jaldaýdy – memleket salyp bergen úıdi jaldaý dep uǵý kerek.
Sondaı-aq joǵaryda aıtqanymyzdaı, qonys aýdarýshylardy jańa turǵyn úımen qamtamasyz etý boıynsha da sharalar qabyldanǵan. Bári de jaıly, jańa, tynysy keń úılerge túsedi. Olarǵa tipti jergilikti turǵyndar qyzyǵýshylyqpen qarap júr.
Jýyrda Soltústik Qazaqstan oblysynda bolǵan saparynda Prezıdent Qasym-Jomart Toqaev Aqqaıyń aýdanyndaǵy Chapaev selosyna kóship kelip jatqan bir top turǵynmen kezdesip, olardyń úılerin kózimen kórdi. Elimizdiń jumys kúshi artyq aýdandarynan kóship kelgen turǵyndar Prezıdentke ózderiniń turmystary jaqsy ekenin, «Eńbek» baǵdarlamasy boıynsha beriletin jeńildikterdiń tegis jasalyp jatqanyn aıtty. Prezıdent olarǵa salynyp jatqan úılerdiń sapasyna rıza ekenin bildirdi. «Jumyspen qamtýdyń jol kartasy» baǵdarlamasyn júzege asyrý mańyzdy. Sonyń nətıjesinde jergilikti jerlerdegi ınfraqurylym damıdy, jańa jumys oryndary ashylady. Oblysta bul məsele tıisti deńgeıde iske asyrylyp jatyr», dedi Memleket basshysy. Sonymen birge ol kóship kelýshilerge aýyl ákimderiniń kelesi jyldan bastap saılanatynyn, sondyqtan olardyń aýyl turǵyndarynyń joq-jitigine tııanaqty kóńil bóletinin jetkizdi.
Soltústik Qazaqstanǵa byltyr 2,2 myń adamdy qamtyǵan 736 otbasy kóship kelgen edi. Qazir olar adaptasııadan ótip, Esil óńiriniń turǵyndaryna aınalyp keledi. Solardyń arasynan Á.Perdebaı degen azamatpen áńgimeleskenimizde, ol óziniń byltyr kóship kelgenin, Soltústik Qazaqstanǵa eti úırenip kele jatqanyn aıtty. «Munda básekelestik qatty emes eken. Qazirgi jasap jatqan tirligim muǵalimdik bolǵanymen, aldaǵy ýaqytta baý-baqsha ósirýge de múmkindik bar», dedi ol.
Kóship kelýshiler Almaty, Jambyl, Mańǵystaý, Túrkistan, Qyzylorda oblystary, sondaı-aq Nur-Sultan, Almaty jáne Shymkent qalalarynan. Jasyratyny joq, sýyq óńirdi jersinbeı, qaıta kóship ketkenderi de bar. Alaıda negizgi halyq bir-birine qarap, jergilikti mekenge úırenip keledi. Degenmen alys shetelderge de úırenip ketetin qandastarymyz ózderiniń ata-qonystaryna sińip ketedi degen úmit basym.
Soltústik Qazaqstan oblysy