Qoǵamdaǵy dinı ahýal tóńiregindegi shıelenisterge jurtshylyqtyń alań kóńilmen qaraýy – qulshylyq qylýdyń mánisin tereńnen túısine almaýshylyqtyń, ıman uǵymyn ǵıbadat túsiniginen aıyra almaı daǵdarýshylyqtyń belgisindeı kórinedi. Munyń ózi bizge ıslamnyń rýhanı álemine tereńdep barýdyń, oǵan «júrek kózimen» qaıta qaraýdyń mezgili jetkenin ańǵartyp otyr.
Qoǵamdaǵy dinı ahýal tóńiregindegi shıelenisterge jurtshylyqtyń alań kóńilmen qaraýy – qulshylyq qylýdyń mánisin tereńnen túısine almaýshylyqtyń, ıman uǵymyn ǵıbadat túsiniginen aıyra almaı daǵdarýshylyqtyń belgisindeı kórinedi. Munyń ózi bizge ıslamnyń rýhanı álemine tereńdep barýdyń, oǵan «júrek kózimen» qaıta qaraýdyń mezgili jetkenin ańǵartyp otyr.
Búginde dúnıe dıdaryn sharpyǵan rýhanı jáne dinı daǵdarys qazaq qoǵamyn da aınalyp ótpeı, alańdaýshylyq týǵyza bastady. Ásirese, aǵa býyn ókilderi jat ilimderdiń jeteginde ketken, teris ýaǵyzdyń shyrmaýyna ilingen jastardyń dinı kózqarastaryn uǵyna almaı, bas shaıqaıtyny ras. Mine, osydan shyǵar qorytyndy qandaı bolmaq? Teris pıǵyldy aǵymdardyń tuzaǵyna túsken, solardyń áserinen adasýshylyqqa boı aldyrǵan jandardy qalypty ortaǵa qalaı qaıtarýǵa bolady? Árıne, bul saýaldardyń barlyǵyna jaýap tabý, eń aldymen, qoǵamdy rýhanı túrde saýyqtyrý úshin qajet.
«Úles-2020» qoǵamdyq qory men Bilim jáne ǵylym mınıstrliginiń Jastar isi jónindegi komıtetiniń, sondaı-aq, Astanadaǵy Polıtehnıkalyq kolledjdiń uıytqy bolýymen «Dinı ekstremızmniń aldyn alý» taqyryby boıynsha uıymdastyrylǵan dáriste, mine, osy saýaldar talqy tarazysyna salyndy.
Kolledj stýdentteri men oqytýshylaryna arnalǵan dáriske dinı ekstremızmniń aldyn alýda aqparattyq-nasıhattyq jumystardy belsendi túrde júrgizý, dástúrli dinderdiń tarıhy jóninde jetkilikti mólsherde aqpar berý, Qazaqstandaǵy konfessııaaralyq turaqtylyqty damytý, destrýktıvti aǵymdardyń negizgi baǵytyn áshkereleý, qazaq halqynyń mádenıeti men rýhanı murasyn nasıhattaý sekildi birqatar máseleler ózek boldy.
Aǵartýshylyq baǵyttaǵy dáristi júrgizgen «Destrýktıvti dinı aǵymdardan zardap shekkenderge kómek kórsetetin ortalyqtar assosıasııasynyń» dırektory Iýlııa Denısenko: «Mundaı dárister jastar ortasyndaǵy mádenı-rýhanı sana-sezimin qalyptastyrý, olardyń dinı saýatyn kóterý maqsatynda uıymdastyrylyp otyr», – deı kele, bul dárister aıasynda jastardyń teris aǵymdardyń jeteginde ketpeýi úshin tıisti baǵyt-baǵdar beriletinin atap ótti. Onyń aıtýynsha, mundaı saýat ashý dáristeriniń tárbıelik mańyzy zor bolatyndyqtan, kelesi kezdesýlerdi Astanadaǵy Sáken Seıfýllın atyndaǵy agrotehnıkalyq ýnıversıtette uıymdastyrý kózdelip otyr eken. Bul oqý ordasynda «Qazaqstandaǵy konfessııaaralyq jáne ultaralyq kelisimdi qalyptastyrý jáne nyǵaıtý», «Jastar ortasyndaǵy mádenı sanany qalyptastyrý» taqyryptarynda dóńgelek ústelder uıymdastyrylmaq.
Árıne, ımany jarym, dinı saýaty tómen jastardyń bolmys-baǵdary kúmándi aǵymdardyń tuzaǵyna ońaı iligetinin eskersek, mundaı sıpattaǵy dáristerdi júıeli ótkizýdiń ózektiligin ýaqyt kórsetip otyr.
Láıla EDILQYZY,
«Egemen Qazaqstan».