Túrkistan oblysy, Maqtaaral aýdanynda jergilikti kásipker aýdandyq aýrýhananyń janynda ornalasqan óziniń jekemenshik jer telimine tikushaq qonatyn alań salyp berdi. Buǵan deıin aýyr jaǵdaıdaǵy naýqastardy oblystyq emdeý mekemelerine jetkizetin tikushaq eldi meken shekarasyndaǵy egistik alqaptarǵa qonatyn bolǵan, dep habarlaıdy Egemen.kz oblys ákiminiń baspasóz qyzmetine silteme jasap.
Naýqastyń taǵdyry úshin árbir sekýndtyń mańyzdy ekeni belgili. Sondyqtan sanavıasııa qyzmeti aýyldyq jerlerdegi adam ólimi men adam ómiriniń uzaqtyǵyna áser etetin basty baǵyttardy biri.
Aýrýhana janynan ashylǵan jańa alań densaýlyq jaǵdaıy múshkil emdelýshilerdi sanavıasııanyń kúshimen jedel jetkizý qyzmetiniń tıimdi jumys isteýine sep bolmaq.
"Atakent" aýdandyq aýrýhanasyna tartý jasaǵan kásipker Qanat Myrzahmetov osyǵan deıin de kóptegen úlgi bolarlyq isterimen kóptiń alǵysyn alyp keledi. Azamat eldegi pandemııamen kúres kezinde aýdandyq aýrýhanalarǵa jalpy sany 12 IVL apparatyn syıǵa tartqan. Aımaqta oryn alǵan sý tasqyny kezinde de qarap qalmaǵan. Jerlesterin apattan aman alyp qalýǵa atsalysqan.