Ǵarysh aılaǵy atanǵan Qaraǵandynyń Balalar men jasóspirimder saraıynda halyq súıispenshiligine bólenip, beıneli túrde shaǵala atanǵan, álemdegi tuńǵysh ǵaryshker áıel Valentına Tereshkovanyń ǵaryshqa saparyna 50 jyl tolýyna oraı merekelik shara bolyp ótti. Bul rásimge ǵarysh salasyna qatysy bar ardagerler, ustazdar men oqýshylar qatysty. Qaraǵandylyq oqýshylar legin medısına kolledjiniń stýdentteri, № 91, 35 jalpyǵa birdeı bilim beretin orta mektepterdiń kadetteri, «Murager» lıseıiniń jáne tehnıkalyq lıseıdiń shákirtteri, sondaı-aq, áskerı bólimshelerdiń ókilderi qurady.
Ǵarysh aılaǵy atanǵan Qaraǵandynyń Balalar men jasóspirimder saraıynda halyq súıispenshiligine bólenip, beıneli túrde shaǵala atanǵan, álemdegi tuńǵysh ǵaryshker áıel Valentına Tereshkovanyń ǵaryshqa saparyna 50 jyl tolýyna oraı merekelik shara bolyp ótti. Bul rásimge ǵarysh salasyna qatysy bar ardagerler, ustazdar men oqýshylar qatysty. Qaraǵandylyq oqýshylar legin medısına kolledjiniń stýdentteri, № 91, 35 jalpyǵa birdeı bilim beretin orta mektepterdiń kadetteri, «Murager» lıseıiniń jáne tehnıkalyq lıseıdiń shákirtteri, sondaı-aq, áskerı bólimshelerdiń ókilderi qurady.
Ardagerler qatarynda ǵaryshkerlerdi qutqarý otrıadynda shırek ǵasyrdan astam jumys istegen joǵary sanatty dáriger Petr Lohnıskıı, Qaraǵandy avıakásiporny ushqyshtar otrıadynyń burynǵy komandıri Vıktor Jýravlev, planershi, ushqysh sportshy Neılıa Shechkına, oblystyq jáne qalalyq ardagerler keńesteriniń músheleri Garı Shýmaher, Ábsamat Tıshbaev jáne taǵy basqalar boldy.
Merekelik is-sharany oblystyq ádistemelik ortalyq dırektorynyń orynbasary B.Ábdikerova ashyp berdi. Kelesi sóz kezegin alǵan respýblıka bilim berý isiniń úzdigi, kosmonavtıka isine sińirgen eńbegi úshin Reseı Federasııasy men Qazaqstan Respýblıkasynyń arnaıy tósbelgisin úsh márte alǵan, ǵaryshkerler murajaıynyń meńgerýshisi, osy ráýishti rásimdi uıymdastyrýshy M.Káribekova murajaı jumysyna jan-jaqty toqtaldy. V.Tereshkova, T.Musabaev týraly kórsetilgen beınesıýjetterge túsiniktemeler berip turdy. Elimizdegi jastardy ınnovasııa men patrıotızmge tárbıelep kele jatqan ǵarysh qyzmetine arnalǵan birden-bir murajaıdyń qalypty jumys isteýine oblystyq bilim basqarmasynyń bastyǵy E.Imanǵalıevtiń únemi qoldaý kórsetip otyratyndyǵyna rızashylyǵyn bildire ketti. V.Tereshkovanyń ózi bul murajaıdy 2009 jyly ádeıilep kelip kórip, onyń qyzmetine joǵary baǵa bergen bolatyn. Murajaı qazaqstandyq jáne reseılik ǵaryshkerlermen turaqty baılanys ustap, hattar almasyp, olarmen oqýshylar kezdesýlerin ótkizip otyrady. Máselen, kelesi apta ishinde munda reseılik ǵaryshkerlermen kezdesý ótkizilmek.
«Ǵalamdy kezgen kóshpeli» («Kochevnık Vselennoı») beınefılmin tamashalap otyryp oıǵa qalasyń. Iá, qazir adamzat óz ómirin ǵaryshsyz elestete almaıdy. 1961 jyldyń 12 sáýirinde Iý.Gagarın alǵash ushqanda, eshkim de dál búgingideı bári utqyrly, bárin de ǵaryshtan baqylaýǵa bolatyn zamanǵa jetetinin oılamaǵan edi. Ǵaryshty ıgerý ómirdiń barlyq salasyna jańalyq ákeldi. Máselen, aýyl sharýashylyǵyn damytý kerek deıik. Ol úshin aýa raıynyń qubylysy, mal jaıylymy, aýyz sýdyń jetkiliktiligi baqylanýǵa tıis. Al ony baqylaý tek ǵarysh arqyly júzege asady.
Ara-tura ǵarysh aılaǵyn jabý kerek degen pikir de aıtylyp qalady. Alaıda, adamzatta ǵaryshty óristete ıgerýden basqa jol qalǵan joq. Dúnıeniń ajary ketip, tabıǵat tozyp barady. Kúnderde bir kún ǵalamsharymyzdyń resýrstary bitedi. Ulybrıtanııanyń ataqty astrofızıgi, kosmolog Stıven Hokıng adamzat balasyn asyqtyryp, taıaýdaǵy myń jyldyń ishinde basqa mekenge kóship-qonýdy usynyp otyr. Al ekologııany saýyqtyrýdyń joldary kóp. Sonyń biri – Elbasymyz usynyp otyrǵan jasyl ekonomıka. Taıaý arada Qazaqstan aýmaǵynda «Báıterek» dep atalatyn taǵy bir ǵarysh aılaǵy iske qosylmaq. Odan geptıl sııaqty ýly, zalaldy otyndy paıdalanbaıtyn ǵaryshkemeler ushyrylmaq. Solardyń birinde Alashtyń aı mańdaıly bir arýy V.Tereshkova sekildi ǵarysh zańǵaryna qanat qaǵar dep úkili úmit jalǵaımyz...
Tereshkova ushqan jyly Keńes eli áskeri qatarynda azamattyq boryshyn atqarǵan, «Qazaq KSR halyq aǵartý isiniń ozyq qyzmetkeri», ulaǵatty ustaz, Qazaqstan Jýrnalıster odaǵynyń múshesi Tileýǵaly Ámirtaıuly ǵıbratty esteligin aıtyp, óz sózin:
Jerinde qazaq toı bolsyn,
Tilekter bári oń bolsyn.
Ǵaryshqa taǵy samǵarlyq,
Salǵan joly keń bolsyn! – degen bataǵa bergisiz izgi tilegimen aıaqtady.
Ár sóılengen sózden keıin mýzykalyq sálemdeme berilip turdy. Halyqaralyq, oblystyq jáne qalalyq konkýrstardyń dıplomanty Medet Máýlenov «Jerim meniń», Qalı Baıjanov atyndaǵy konserttik birlestiktiń ánshisi Aıdar Qappasov «Galaktıka balalary» ánderin naqyshyna keltire oryndady.
«Plaz» tehnıkalyq shyǵarmashylyq klýbynyń jetekshisi N.Marfýtenko óziniń shákirtteri daıyndaǵan V.Tereshkova ushqan «Vostok» ǵaryshkemesiniń úlgisin ǵaryshkerler murajaıyna tartý etti.
Kezinde jerles ushqyshtardyń birneshe legin daıarlaǵan, búginde 70 jasqa kelip otyrǵan Qaraǵandy avıakásiporny ushqyshtar otrıadynyń burynǵy komandıri V.Jýravlevke qushaqqa áreń syıatyn gúl shoǵymen qosa, arnaıy quttyqtaý men marapattaý tapsyryldy.
Rásim sońynda aıtýly kún qurmetine oraı Balalar men jasóspirimder saraıynyń dırektory Sh.Altynbekova, onyń tárbıe jónindegi orynbasary A.Raqysheva, Shet aýdany Aǵadyr kenti lıseıiniń tehnologııa pániniń muǵalimi G.Orymbekova avıasııa jáne kosmonavtıka murajaıynyń «Kómek jáne qoldaý úshin» qurmet gramotalarymen marapattaldy.
«Balalar – bizdiń bolashaǵymyz» balalardyń kórkem shyǵarmashylyǵy konkýrsynyń jáne «Ǵaryshkerler ómirinen ne bilesińder?» vıktorınasynyń jeńimpazdary anyqtaldy. Jas sýretshiler arasynda Gagarın atyndaǵy Aǵadyr lıseıiniń oqýshylary Kırıll Gavrılov, Maqsat Temirlan, Aıana Balataı júldeli úsh oryndy bólisti. Balǵyn bilimpazdar arasyndaǵy júldeli úsh oryndy Buqar jyraý aýdany Botaqara kentiniń shákirtteri Aınur Eseeva, Kámil Qaıyrbekov jáne Elvıra Mombaeva ıelendi.
Merekelik rásimge jınalǵandar mazmundy da tartymdy ótken is-sharaǵa dán rıza bolyp tarqasty.
Sábıt BEKSEIIT.
QARAǴANDY.