Bilim jáne ǵylym mınıstrligi baspasóz qyzmetiniń habarlaýynsha, Qazaqstan qurama komandasy 61-shi Halyqaralyq matematıkalyq Olımpıadada (International Mathematical Olympiad) úsh kúmis jáne eki qola medal jeńip aldy. IMO 2020 jarysyna álemniń 100-den astam elinen joǵary synyp oqýshylary qatysty. Qazaqstandyq komandanyń quramynda 6 adam boldy.
Qurama komandanyń jattyqtyrýshysy, matematıka páni boıynsha halyqaralyq olımpıadalardyń birneshe dúrkin jeńimpazy Qanat Satylhanov shákirtteriniń jetistikterine kóńili tolatynyn atap ótti. Bıyl balalar IMO 2020 halyqaralyq saıystyń barlyq qatysýshylary sııaqty qashyqtan daıyndaldy.
«Olımpıada proktorıng júıesi arqyly ótti. Qazaqstannyń komandalyq nátıjeleri ótken jylmen salystyrǵanda aıtarlyqtaı jaqsardy. Altyn medal jeńip alýǵa bir ǵana upaı jetpedi. Negizinen bizdiń balalarymyz óte myqty. Ár bala óz aldyna qoıǵan maqsatyna jete alady. Osy rette balalarǵa qoldaý kórsetý mańyzdy. Ata-analar men pedagogterge birlesken eńbegi úshin alǵys aıtamyn», dedi Q.Satylhanov.
El namysyn qorǵaǵan komanda quramyna almatylyq Taır Satýbaldın, Tamırlan Bektemisov, Nurtas Shyntas, Iýrıı Ten jáne nur-sultandyq Danat Dúısenbekov pen Fetýllah Sam kirdi.
Halyqaralyq matematıka olımpıadasynyń erejelerine sáıkes joǵary synyp oqýshylary eki kúnniń ishinde 6 esepti sheshýi tıis. Tapsyrmalar matematıkanyń ártúrli bólimderi boıynsha, negizinen geometrııa, algebra, sandar teorııasy jáne kombınatorıkadan beriledi.