Búginde elimizde karantın talaptary birshama jeńildetilgenmen, qaýipti indetpen kúres áli tolastaǵan joq. Azamattardyń qaýipsizdigin qamtamasyz etý maqsatynda memleket tarapynan da, kásipkerlerdiń tarapynan da tıisti qoldaýlar kórsetilip jatyr.
El ishinen shyǵyp, elge kómek qolyn sozǵan jomart jandar jeterlik. Bul iske jambyldyqtar da bir kisideı atsalysyp, jerlesterine kómek berýde. Máselen, jýyrda ǵana T.Rysqulov aýdany, Qulan aýylynyń týmasy, bul kúnde Memlekettik kúzet qyzmeti bastyǵynyń orynbasary, general Ardaq Áshimbekuly óziniń jáne otbasynyń atynan aýdandyq ortalyq aýrýhanaǵa 10 mln teńgege turǵyndarǵa medısınalyq kómek kórsetýge qajetti qural-jabdyqtar satyp alyp berdi. Onyń ishinde farmasevtıkalyq tońazytqysh, dezkamera, dozator, «Bobrov» jabdyǵy, aýa resırkýlıatory, jyljymaly kvars lampasy, medısınalyq betperdeler men qolǵaptar, kózildirikter jáne jeke qorǵanysh kıimderi de bar.
«Koronavırýs indetimen kúreske óziniń azamattyq úlesin qosyp kele jatqan osyndaı jomart jandardyń bar ekeni kóńilge qýanysh uıalatady. Pandemııa kezinde jerlesterine qolushyn sozyp, demeýshilik kórsetken azamat Ardaq Áshimbekulyna alǵysymyzdy bildiremiz. Mundaı medısınalyq qural-jabdyqtar qaýipti indetke shaldyqqan naýqastardyń tezirek saýyǵýyna, otbasyna aman-esen oralýyna septigin tıgizedi dep senemiz», deıdi T.Rysqulov aýdandyq ortalyq aýrýhanasy bas dárigeriniń emdeý isi jónindegi orynbasary Raýshan Kósherbekqyzy.
Jalpy, aýdandyq aýrýhana koronavırýs indetiniń ekinshi tolqynyna tolyǵymen daıyn. Qural-jabdyqtary saqadaı saı. Búginde atalǵan medısınalyq nysannan barlyǵy 200 tósektik emdeý oryndary ashylǵan.
Jambyl oblysy