Fransııanyń zilzalaǵa tózimdi qurylys qaýymdastyǵy (AFPS) Qazaq qurylys jáne sáýlet ǵylymı-zertteý jáne jobalaý ınstıtýtyna («QazQSǴZI» AQ) yntymaqtastyq týraly usynyspen resmı hat joldady.
AFPS qurmetti prezıdenti Per Sollogýb (Pierre Sollogoub) Qazaqstan Respýblıkasynyń zilzalaǵa tózimdi qurylys qaýymdastyǵynyń tóraǵasy, «QazQSǴZI» AQ óndiris jónindegi basqarýshy dırektory Eraly Shoqbarovty zilzalaǵa tózimdi qurylys salasyndaǵy birlesken jobalarǵa qatysýǵa shaqyrdy.
Taraptar yntymaqtastyq sheńberinde ǵımarattar men qurylystardyń zilzalaǵa qaýipsizdigin qamtamasyz etý máseleleri boıynsha tájirıbe almasyp, jańa qurylys tehnologııalaryn zerttep, qoldana alady, jas mamandardy birlesip oqytýǵa jáne ortaq teorııalyq jáne tájirıbelik zertteýler uıymdastyrady.
Eske sala ketsek, 2020 jyldyń shildesinde Qazaqstan Halyqaralyq zilzalaǵa tózimdi qurylys qaýymdastyǵyna (IAEE) kirdi. Osyǵan baılanysty Eraly Shoqbarovqa Qazaqstan Respýblıkasynan IAEE ulttyq delegaty ataǵy berildi.
Aıta ketelik, Qazaqstannyń zilzalaǵa tózimdi qurylys qaýymdastyǵy Qazaq qurylys jáne sáýlet ǵylymı-zertteý jáne jobalaý ınstıtýty («QazQSǴZI» AQ) bazasynda qurylǵan. «QazQSǴZI» AQ – asa kúrdeli ınjenerlik-geologııalyq jaǵdaıdaǵy aýdandar men zilzalaǵa qaýipti óńirlerdi qosa alǵanda, Qazaqstan qurylysyn damytý salasyndaǵy elimizdegi jalǵyz memlekettik ǵylymı-zertteý jáne jobalaý ınstıtýty. Instıtýttyń 89 jyldyq jumys tájirıbesi bar. Al Fransııanyń zilzalaǵa tózimdi qurylys qaýymdastyǵy French Earthquake Engineering Association (AFPS) – 1983 jyly qurylǵan kommersııalyq emes uıym. Qaýymdastyq zilzala jáne onyń topyraq, qurylystar men qorshaǵan ortaǵa saldaryn zertteýmen, sondaı-aq tótenshe jaǵdaı saldaryn joıý jáne adam ómiri qaýipsizdigin qamtamasyz etý salasynda zertteýmen aınalysady.