Qyzylordada kásiporyndar men áleýmettik sala nysandarynyń aldaǵy jylý berý maýsymyna daıyndyǵy bekitilgen kestege sáıkes júrgizilip keledi. Jaýapty mekemelerdiń maýsym aldyndaǵy málimetine súıensek, kommýnaldyq kásiporyndardyń jóndeý jumystary 97 paıyzǵa oryndalsa, áleýmettik sala nysandary men avtonomdy qazandyqtar maýsymǵa tolyq daıyn. Ortalyqtandyrylǵan jylý júıesine qosylǵan kópqabatty turǵyn úılerdiń ázirligi de pysyqtalyp jatyr.
Oblystaǵy 1 185 áleýmettik nysanǵa bıylǵy qystan shyǵý úshin 39,5 myń tonna kómir jáne 26 myń tonna suıyq otyn qajet. Áli de gaz jete qoımaǵan eldi mekenderdegi turǵyndarǵa 163,6 myń tonna kómir kerek. Jalpy óńirde 30 kómir qoımasy bar.
– Qazir turǵyndarǵa qajetti kómirdiń 85 myń tonnasy jetkizildi. Kómir baǵasynyń ósýine jol bermeý maqsatynda óndirýshi kásiporyndarmen tikeleı kelisimshart jasaý baǵytynda jumystar atqarylýda. Qysqa daıyndyqty oblystyq shtab turaqty baqylaýda ustap otyr, – deıdi oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Erlan Jańabaev.
«QazTransGaz Aımaq» AQ Qyzylorda óndiristik fılıaly aldaǵy jylý maýsymyna baılanysty gazdy qaýipsiz paıdalaný baǵytynda aılyq jarııalap otyr. Shara aıasynda fılıal ókilderi tutynýshylarǵa nusqaýlyqtar men jadynamalar tarata otyryp, túsindirme júrgizetin bolady. Qaýipsizdik talaptary óreskel buzylǵan jaǵdaıda nysan gaz júıesinen ajyratylady.
«QazTransGaz Aımaq» AQ Qyzylorda óndiristik fılıaly dırektorynyń birinshi orynbasary Ermek Qaldyǵulov tutynýshylarda gaz tutyný júıelerine tehnıkalyq qyzmet kórsetýge arnalǵan sharttardyń bolýy keregin aıtyp otyr. Sondaı-aq tutynýshylar tútin jáne jeldetý arnalaryn mezgildi tekserýden ótkizip, tazalap jaramdylyq týraly aktilerin alýy kerek, qaýipsizdik maqsatynda metan men SO ýly gazyna sıgnalızator ornatqany jón.
Kommýnaldyq qyzmet tólemaqysynyń jınalýy túıindi máseleniń biri ekeni ras. Osyǵan baılanysty qazir «QazTransGaz Aımaq» AQ QО́F fılıaly men «RSKÝ-Qyzylorda» JShS mamandary birlesken reıd ótkizip, qaryzy qordalanǵan tutynýshylardy gazdan ajyratýǵa májbúr.
Qazir tutynýshylardyń gazǵa bereshegi 1 mlrd teńgeden asqan. «QazTransGaz Aımaq» AQ QО́F mamandary tutynýshy túbirtek paraǵyna sáıkes ár aıdyń 25-ne deıin tólem jasaýy qajettigin eskertip otyr.
Osyndaı qıyndyqtarǵa qaramastan jylý berý maýsymy merziminde bastalady. Jaýapty merzimdi oıdaǵydaı ótkizý úshin jan-jaqty daıyndyq jasalǵan.
Qyzylorda